14.02.2013, 15:25 Туркоглу суспендиран поради допинг
Кошаркарот на Орландо ќе паузира 20 натпревари
Фановите на Хидает Туркоглу се разочараа кога разбраа дека кошаркарот паднал на допинг-тест. НБА-лигата извести дека турскиот интернационалец ќе добие суспензија од 20 меча како казна за користење недозволени супстанции.
„Кога бев во Турција летоска тренерот ми даде лекови за што побргу да закрепнам од повредата на рамото. Не знаев дека во лековите има забранети супстанции, не ни проверував што земам. Станува збор за недоразбирање затоа се извинувам на Орландо, на лигата и на сите навивачи“, објасни Туркоглу. Казната беше ефективна веднаш, уште од натпреварот против Атланта во средата.
Роуз можеби нема да се врати сезонава
Дерик Роуз ги урна сништата во „Јунајтед центар“ за преродба во сезоната 2012/13. Најдобриот играч на Чикаго Булс изјави дека не знае кога ќе се враќа и дека можеби тоа нема воопшто да се случи до крајот на сезоната. „Навистина не знам кога. Се чувствувам добро, но ако помине уште долго време пред да бидам во потребната форма, нема да ми пречи да ја пропуштам сезоната. Не велам дека не сакам, едвај чекам да заиграм, затоа и почнав со интензивна рехабилитација. Меѓутоа, ако не заздравам како што треба, која е поентата“, беше искрен Роуз. Ова доаѓа како шок откако во последниве недели тој почна да тренира, а експертите прогнозираа дека ќе се врати најмногу за еден месец.
Кармело го пропушта Олстарот?
Најдобриот стрелец на Њујорк Никс, Кармело Ентони, ја наби десната рака, на мечот против Торонто и поради тоа можно е да го пропушти натпреварот на ѕвездите, в недела. Уште во првата четвртина тој почувствувал трпки и болка во раката, што влијаеше на неговиот ефект на мечот (само 12 поени со шут 5/24). „Дефинитивно нема да форсирам. Колку и да посакувам да играм на Олстар-натпреварот, ако не можам - не можам. Ако чувствувам проблем до недела, нема да играм“, се изјасни Ентони.
Портланд на -36 во Њу Орлеанс
Резултати од НБА: Орландо - Атланта 76:108, Кливленд - Сан Антонио 95:96, Индијана - Шарлот 101:77, Бостон - Чикаго 71:69, Њујорк - Торонто 88:92, Детроит - Вашингтон 96:95, Милвоки - Филаделфија 94:92, Њу Орлеанс - Портланд 99:63, Минесота - Јута 93:97,. Далас - Сакраменто 123:100, Л.А. Клиперс - Хјустон 106:96.
|
