05.02.2013, 15:38 Кавани се сели во Реал Мадрид
Според шпанските медиуми, претседателот на „кралскиот клуб“, Флорентино Перез, и менаџерот на Кавани веќе ги договориле деталите од договорот
Се' поизвесно е дека соиграчот на Горан Пандев во Наполи Едисон Кавани, од следното лето ќе биде дел од тимот на Реал Мадрид.
Според шпанските медиуми, претседателот на „кралскиот клуб“, Флорентино Перез, и менаџерот на Кавани веќе ги договориле деталите од договорот.
Колкава е сумата за трансферот засега не е познато, но според сегашниот договор на Кавани со Наполи, тој може да го напушти италијанскиот клуб ако некој плати за него 63 милиони евра. Но од Реал Мадрид се подготвени да платат 50 милиони евра и да испратат кај „наполитанците“ некој од нивните фудбалери на кои нема да сметаат за следената сезона.
За Кавани беа заинтересирани и Пари Сен Жермен и Манчестер сити, но тој го избрал Реал.
Едисон Кавани на 121 натпревар за Наполи има постигнато 93 гола. За репрезентацијата на Уругвај настапил 45 пати и бил стрелец на 13 погодоци.
Малезани ќе го спасува Палермо
По серијата слаби резултати, италијанскиот калчолигаш Палермо одлучи да го разреши досегашниот стратег Џанпјеро Гасперини, а како негов наследник се очекува денеска официјално да биде назначен Алберто Малезани. Палермо падна на дното од табелата, откако во последното коло со 1:2 загуби на свој терен од Аталанта, а Сиена освои три бода против Интер.
„Палермо реши да се раздели од Гасперини. Името на новиот тренер официјално ќе биде соопштено утре“, стоеше во вчерашната изјава од Палермо.
На Малезани, кој во 1999 година ја предводеше Парма до триумф во Купот на УЕФА 1999 година, главна цел ќе му биде да го спаси клубот од испаѓање.
Роналдо не сака да ги споредува Мурињо и Ферги
Кристијано Роналдо не можеше да каже кој е подобар тренер ако треба да ги спореди сер Алекс Фергусон и Жозе Мурињо. Роналдо моментно е член на Реал и за стратег го има Мурињо, но Португалецот не заборава дека светската слава ја стекна во Манчестер јунајтед под водство на популарниот Ферги.
„Не би било фер да одберам еден од нив двајца. Тоа е како да споредувате Ферари и Порше. Двајцата се многу добри. Имаат големо искуство и сакаат да победуваат. Затоа и толку пати се радувале на титули“, рече Роналдо во пресрет на дуелот меѓу Манчестер јунајтед и Реал Мадрид во рамките од осмина финалето на Лигата на шампионите.
Лацио месец и пол без Клозе
Лацио во следните шест недели ќе биде без напаѓачот Мирослав Клозе, кој ја влоши повредата на лигаментите на коленото. На последните неколку меча Клозе играше недоволно закрепнат, а по лекарските прегледи било констатирано дека напаѓачот ќе мора да оди на подолга принудна пауза. Германскиот напаѓач сезонава е прв стрелец во тимот со десет гола. |
