Карабатиќ блиску до Барселона

Француските и шпанските медиуми тврдат дека еден од најдобрите светски ракометари Никола Карабатиќ е блиску до трансфер во Барселонa

Според француските и шпанските медиуми, еден од најдобрите светски ракометари Никола Карабатиќ е блиску до трансфер во Барселона. Како што пишува шпанска „Марка“, 29-годишниот Французин во наредните неколку дена треба да потпише договор на три или на четири години со седумкратниот европски клупски првак. „Марка“ потсетува дека сегашниот член на францускиот прволигаш Прованс, каде што замина од Монпелје по аферата со нелегално обложување и лажирање резултати од која излезе со ослободителна пресуда, беше блиску до потпис за Барса и во 2009 година, но тогаш замина во Кил.

Најтиражниот дневен спортски лист во светот „Ле екип“, пак, тврди дека, иако самиот Карабатиќ вели дека нема ништо потпишано, двете страни постигнале договор.

„Се разбира дека сум во контакт со Барса, разговорите се во тек и оваа перспектива е многу интересна. Но, ние се' уште сме во фаза на разговори, исто како и со уште еден или два други клуба“, изјави бекот, кој освои се' што можеше со француската репрезентација.