15.04.2013, 20:48 Милевски старо-нов тренер на Вардар
Тренерот што го водеше тимот до есенската титула, по што беше заменет со Никола Илиевски, кој даде оставка по саботниот пораз од Пелистер, доби ангажман до јуни 2014 година
По неуспешната тримесечна епизода со Никола Илиевски, Благоја Милевски повторно ќе ја води екипата на Вардар, откако непосредно пред почетокот на подготовките за пролетниот дел беше заменет токму од популарниот Џиџи. Раководството на шампионот денеска ја прифати оставката на Илиевски по поразот од Пелистер во саботата и го врати на клупата Милевски, потпишувајќи договор со него до јуни 2014 година. Тој од јануари наваму беше координатор на младинската школана црвено-црните, а практично ќе го преземе кормилото в среда против Шкендија во Тетово во првиот натпревар од полуфиналето на Купот на Македонија. Нему ќе му помага Звонко Златановски, а тренер на голманите ќе биде Бејдоган Ставелеци, кој и претходно работеше со првиот тим.
"Ми претставува чест што повторно ја добивам довербата за да го водам првиот тим, што е потврда за мојата добра работа во есенскиот дел. За разлика од тогаш, овој пат не стартуваме од нула, туку од минус во однос на конкурентите, но јас силно верувам во фудбалерите што еднаш веќе ја освоија шампионската титула, а беа и есенски прваци сезонава. Сигурен сум дека за шест месеци не заборавиле да играат фудбал, па цврсто сум убеден дека заедно ќе успееме да ја одбраниме титулата", изјави Милевски на денешната промоција во присуство на претседателот на Одборот на директори на клубот, Зоран Шишковски, и на директорот Боби Митев.
Милевски ја презеде екипата по изборот на Илчо Ѓорѓиоски за претседател на Фудбалската федерација на Македонија и со него Вардар презими на врвот на табелата во Првата македонска фудбалска лига. Но, во почетокот од годинава неочекувано беше заменет со Илиевски, кој немаше ниту една победа во седумте подготвителни средби, а со киксот против Пелистер вардарци се најдоа на третото место, со еден бод помалку од Хоризонт Турново и од Металург, кои имаат по 47 по досега одиграни 25 кола од предвидените 33. Во следниот круг претстојниот викенд најтрофејниот македонски фудбалски клуб ќе му гостува на прволигашкиот дебитант Дрита од Боговиње. (Р.Д.) |
