Си велам

Десетте најголеми лаги

Ерол Ризаов

Направете ваша ранг-листа на најголемите манипулации на политиката со јавноста

Кои се десетте најголеми лаги и манипулации на јавната политичка сцена во Македонија. Направив една моја ранг-листа, се разбира, пристрасна онака како што јас мислам. Направете и вие Ваша, па споредете ја со мојата. Може да биде интересно и корисно да видиме кој каде гледа и што видува. Нели, една од големите убавини на демократијата се разликите кои умните луѓе одамна ги нарекоа цветови во разни бои и мириси. Значи, мојот избор на десетте најголеми лаги и шпекулации не се по урнек на Десетте Божји заповеди, затоа слободно сменете им ги местата според ваши критериуми, или додадете си свои фаворити. Се надевам ќе ви биде возбудливо и поучно.

1. Една од најголемите лаги и манипулации со јавноста е како стандардот, подобриот, поквалитетен, посреќен, поубав, послободен живот не се главна тема на македонската политика и медиуми. Нашата најголема грижа, нашата ноќна мора, стресови, стравови од сиромаштија, беда и безработица не се најважна мерка за успешноста на една политика. Тоа е нашата грижа за дома, меѓу најблиските, како нешто срамно, единствено како наша вина, само наш неуспех и трагична интима кога децата ви одат на училиште гладни, кога немате да платите струја, вода и огрев и кога жената ќе ве праша што ќе јадеме денес. Можете како јунакот на еден од големите романи на Маркес во последната реченица гордо да одговорите: Гомна. Ете затоа маршот на гладните не е можен во Македонија колку и да ги има. Да се влезе во таа колона, сите да те видат, е небаре срамно питачење. Кога не можеме за сето ова што страдаме и боледуваме да побараме да биде основна и најважна работа на нашите политички водачи, а не да ги слушаме подзинати нивните басни за големите успеси и достигнувања, тогаш мора да се велемајстори за лаги и илузии. Навистина ако некој ве убеди дека вашата софра е богата, а вие не го гледате тоа, тој што од пустина прави оаза, совршена фатаморгана, тоа мора да е вашиот Господ. Признајте.

2. Демократија. Овој маѓепсан збор сите не' успа. Со полни усни слобода влеговме во новиот политички и економски систем со големи идеали и надежи. Некој порано, некој подоцна, сепак, сите разбравме дека тоа е големата, можеби и најголема измама. Наивно мислевме дека со повеќепартискиот парламент ќе умре едноумието. Сега кога гледаме дека тоа што го викавме режим и еднопартиски систем е недостижно, конечно, се сетивме дека во светот има многу повеќепартиски држави, ама нема демократија. На будалите отпосле им текнува дека промените не се во законите, туку во главите. Да, навистина има промени во нашите глави од едноумието до денес, ама не е на поарно. На полошо ќе да е. Им се извинувам на тие што не се чувствуваат излажани со дострелите на македонската демократија и слободи.

3. Реформи и промени. Точно 37 години како пишувам за реформи и неопходноста од промени. Политички, економски, структурни, здравствени, културни, образовни, социјални... и не знам се какви ти не. И што да ви кажам, како што течат реформите се' бетер и побетер станува. Се' поголема станува и политичката и економската криза. И пазете секогаш за тоа е виновен некој друг. Нема посилна манипулација и лага кога политичарите ќе ви отворат нов пакет-реформи. Колку поголеми и потемелни, тоа потрагични резултати. Зборот реформа во Македонија го изгуби своето вистинско значење. Македонските реформи во сите области се како двете големи диети - кинеската и јапонската. Многу слични, ама само едната дава резултати. Кинеската е по секое јадење, следува секс. Резултатот е катастрофа, станувате се' подебели. Јапонската е обратна, по секој успешен секс, добивате јадење. Дава одлични резултата. Нагло слабеете. Кинезите лажеле по три-четири пати на ден, а Јапонците некогаш не јаделе ништо и по една недела.

4. Меѓуетничките односи и патриотизмот. Како се симнувате подолу од политичките и интелектуалните, верските и универзитетските врвови, на пазарите, на нивите, на улица, лагата е се' повидлива. Додека ги слушате политичарите, подготвени сте со пушка в рака да ја браните татковината од комшиите со кои живееме со векови во истиот двор. Штом имаат некој зорт нашите водачи со првата, втората и трета точка од овој список, тие кинисуваат во патриотска мобилизација на силите по наци��нална, етничка и верска линија. Мотивите за изборна победа се претвораат во јазик на омраза кој тргнува од парламентот и партиските седишта и секавично се движи по плоштадите, училиштата, факултетите, телевизиите и весниците. Неслучајно некој од мудрите луѓе беше рекол патриотизмот е последното скривалиште на криминалците.

5. Избори. Најмногу се лаже пред избори. Се ветуваат рајски двори. Се сатанизираат политичките противници. Ако се собере се' на едно место што им е ветено на граѓаните во овие 21 година, Македонија ќе беше без конкуренција една од најпросперитетните европски држави. А во суштина уште не можеме да ја стасаме 1989 година. Се' уште ниту едни избори не можат да се сведат под епитетот европски. Досега со Македонија владееја само СДСМ и ВМРО-ДПМНЕ со нивните помали партнери. Можеме да полемизираме кој повеќе лажел или крадел, но едно е сигурно - двете заедно се нанедминливи. Други нема.

6. Европа и проблемот со името е една од најголемите манипулации која може да добие и повисоко место на ранг-листата. Стана повеќедецениска сапуница определбата на мнозинството за влез во Европа и во НАТО. Сите се виновни освен народните избраници. Манипулацијата е во тоа што иако сите политички лидери се залагаат за компромис и заедничко прифатливо решение, едните се прогласени за предавници и грчки платеници, а другите за патриоти кои го бранат името, националниот идентитет и јазикот. Некој дебело лаже.

7. Лустрација. Празник на лагата. Потрагата по кодоши е само медиумски спектакл и оцрнување луѓе со закон кој не ги исполнува основните правни стандарди. Наредбодавците на монтираните судски процеси никогаш нема да ги дознаеме, како што нема да дочекаме целосна рехабилитација на најголемите и најзначајни жртви на прогоните. Ординарна лага е дека во сите поранешни комунистички режими е направена лустрација. Со просветлување се нафатија само неколку источноевропски земји и ниту една од поранешна Југославија.

8. Историја. Тоа е единствена наука која која верификува лаги како научни вистини. Најмоќно оружје на политиката за манипулации, дури поопасно од производство на оружје и опиум е злоупотребата на историјата. Потрагата по пославно минато носи чудесни политички резултати. Доказ: проектот „Скопје 2014“. Нигде толку пари не се потрошени за олеснување на градските гулаби.

9. Државна стратегија и приоритети. Тоа е домашна работа само за академиците. Такво нешто не постои, освен во библиотеката на МАНУ покриена со една педа прав. Доктрината на партиите да ја освојат власта е единствената наша стратегија.

10. Кој е крив за сите грешки и лаги. Секогаш друг. Природно.