„Работевме многу, но имавме и пропусти“

Премиерот Никола Груевски со владиниот тим даде отчет за едногодишната работа

Даниела Трпчевска

Работевме многу, работевме посветено. Имавме и грешки, но наша карактеристика е грешките да ги исправаме и да не дозволиме да се направат големи, стратешки грешки. Со овие зборови премиерот Никола Груевски и се обрати на јавноста вчера по повод една година од изборот на Владата.

Во отчетот кој траеше повеќе од еден час, Груевски рече дека зад Владата останале многу проекти, но и дека многу обврски стојат за во иднина. Се надевам дека сите ќе бидеме горди од она што сме го направиле, рече Груевски, додавајќи дека „да работат во интерес на народот е најголема чест и обврска, но и императив и приоритет од која Владата нема да отстапи“.

„Одиме напред, патот е трасиран, целта е видлива. Но, има многу работа пред нас, за да кажеме дека целта е постигната“, вели Груевски. Најважен дел од владината програма, според него, е набавката на медицинската опрема, изградбата и реконструкцијата на болниците, бидејќи со нова опрема ќе се спасат многу животи и навреме ќе се откријат многу болести.

Најголем дел од очетот за работењето на Владата Груевски го посвети на проектите кои биле реализирани во текот на минатата година. Тој рече дека досега се завршени 380 проекти, а над 470 се започнати и е во тек нивната реализација. „Владата ќе остане заедно со граѓаните и во наредните 1.000 мерки кои ќе бидат преземени“, рече премиерот.

„Во услови на криза, успеавме да обезбедиме стабилност и да поминеме со помали лузни во однос на другите држави. Немаше зголемување на даноци, ниту, пак, намалување на плати, или пензии или социјална помош или земјоделски субвенции, иако тоа некои го бараа, туку напротив продолживме со намалување на даноците. Не дозволивме девалвација на денарот или пак ослабување на финансискиот систем на земјата. Немаше масовни отпуштања од компаниите и не се одзеде ниедно стекнато право на граѓаните“, рече Груевски.

Тој додаде дека од Светската банка Македонија беше прогласена за најдобар трет реформатор и е на 22 место во светот за водење бизнис, дека во 2011 година имаше седми најголем раст на БДП во Европа, а државата има еден од најниските долгови од 26,8 отсто од БДП.

„Се водевме од петте стратешки приоритети - зголемување на економскиот раст, интеграција во ЕУ и НАТО, бескомпромисна борба против корупцијата, добри меѓуетнички односи, инвестиции во образованието и наука“, вели Груевски. Во својот отчет тој се осврна на проекти кои треба да се заокружат во наредниот период, како проектот за гасификацијата, вклучувањето на земјава во Јужен тек, изградбата на шесте мали хидроцентрали, инвестицииите во железничкиот сообраќај, изградбата на нови патишта, но и инвестиците во нова опрема во здравствените установи, изградба на нови амбуланти и училишта.

Иако доцнат дел од проектите кои беа најавени дека ќе стартуваат на почетокот на годинава, според Груевски, роковите се поместени, бидејќи се случиле непредвидени околности. „Можно е да има поместувања на роковите, но проектите ќе бидат започнати и ќе завршат. Тоа е разликата меѓу нас и другите“, рече тој.

Груевски посвети малку внимание на политичките теми и проблеми со кои се соочува земјава. Го повтори новиот став од вчера дека за спорот за името повеќе нема да дава изјави, се додека нема нешто суштинско за кое што би сакал да се изјасни. „Ќе се воздржам од изјави за да нема одложување на процесот. Причините за тоа веќе ги соооштив – се одлучив на ваков чекор за да не се злоупотребуваат моите изјави, па и добронамерните, како гест на провокација“, рече Груевски.

СДСМ: Розов театар на Груевски

Проблемите на граѓаните и реалноста апсолутно не содејствуваат со розовиот театарот што се обидува да го продаде премиерот Никола Груевски. Вака вчера реагираше опозиската СДСМ по отчетот на премиерот.

„Му препорачуваме да излезе од блендираниот „мерцедес“, меѓу луѓето и да се соочи со суровата слика и крајно негативните последици од неговото шестгодишно владеење. Благодарение на неговите погрешни политики во изминатите шест години, Македонија се губи во бесперспективност, загрозени се човековите слободи и права, нема медиумска слобода, а патот кон ЕУ и НАТО целосно е блокиран“, смета партијата.

„Единствено нешто што направи Груевски е криминалниот проект и огромната пералница на пари „Скопје 2014“ за која на споменици, камен, бронза, фасади и скапи огради само досега потроши 350 милиони евра народни пари. Овој криминален проект до крајот ќе ги чини граѓаните повеќе од половина милијарда евра“, реагира СДСМ.

Опасноста од рецесија е тука, ребаланс нема да има

„Во услови кога во светот ескалира кризата, не може да се исклучи ниедно сценарио. Но, нашата улога е последиците од таа рецесија да бидат поблаги и да им помогнеме да го пребродат ударот од кризата“, изјави вчера министерот за финасии, Зоран Ставрески запрашан дали Владата се подготвува за воведување на рецесија, како последица на светската криза.

Според него, Владата навреме презела мерки, меѓу кои е издвојувањето на 100 милиони евра со повластена камата за помош на претпријатијата, како и 11 милиони евра кои се издвоени за откуп на земјоделски производи.

Што се однесува до можноста на нов ребаналс во Буџетот, Ставрески засега ја отфрла таквата можност. „Нов ребаланс во сегашната состојба не планираме, ги следиме состојбите, но во оваа фаза не е планирана таква мерка“, рече Ставрески, посетувајќи дека во услови на криза за првпат во Буџетот била планирана ставка од 350 милиони евра намемета за капитални инвестиции. „Ако тие средства целосно се искористат, ќе се даде голема подрдршка на стопанството“, вели тој.