Груевски го кани Самарас на средба на Илинден

Груевски испрати листа на термини до грчкиот премиер Андонис Самарас кога би можеле да се сретнат

Премиерот Никола Груевски реши да не и' дава веќе повод на грчката влада да го критикува, па наредните месеци ќе се воздржува од какви било коментари што се однесуваат на спорот за името или се од суштинско значење на односите меѓу Македонија и Грција, дури и тогаш кога ќе добива такви прашања од новинарите.

Овој, како што го нарекоа некои медиуми, „штрајк“, е одговор на реакциите од Грција по средбата на премиерот со генералниот секретар на Обединетите нации, Бан Ки-Мун, Во политиката тој манир не е невообичаен, но не е многу вообичаено вака да се најавува во јавноста, и тоа како одлука на неговиот кабинет. Паралелно со најавениот молк, Груевски испрати листа на термини до грчкиот премиер Андонис Самарас кога би можеле да се сретнат, меѓу другото нудејќи и да се откаже од славењето на Илинден. Целта, како што беше објаснето, е да не остави простор неговите изјави да бидат користени како алиби за дефокусирање од билатералниот спор, но и да не бидат злоупотребувани од страна на поединци и политичари кај јужниот сосед.

„Сведоци сме на прилично остри и неконструктивни реакции од грчка страна поврзани со содржината на разговорите, со што очигледно се покажува една нервоза и непријатност од вистината којашто е втемелена, не во позициите изнесени од премиерот Груевски, туку од Извештајот на специјалниот пратеник за човекови права на генералниот секретар на Обединетите нации, Геј Мекдугал. За нејзините забелешки во врска со македонското малцинство во Грција и ��аселените лица од граѓанската војна во Грција, впрочем, меѓу другото се разговараше на средбата. Вистината којашто е забележана во извештајот на Мекдугал е навистина непријатна, и од еден таков агол ние разбираме дека е погодена целта, порачаа од Владата.

Во интерес на засилување на дијалогот и создавање позитивен амбиент, Груевски му нуди на Самарас меѓусебни средби, покрај тој на државниот празник Илинден, и на 15 август, 2 септември, 15 септември, но и кој било друг термин или локација кои би биле определени од грчка страна. Поради давањето висок приоритет на ова прашање, премиерот е подготвен да се откаже од какви било претходно закажани активности, патувања или посети, доколку тие се поклопуваат со евентуално предложен термин од грчка страна. (С.Ј.)