Поглед

Проблематична дигитализација

Сања Наумовска

Веќе цела година трае дебатата за висината на таксата која телевизиите треба да му ја платат на новиот дигитален оператор „Оне“

Дигитализацијата на телевизиите, која треба да стартува од јуни, отвори голем број прашања. Како и во секој процес кој прв пат ќе треба да започне да се реализира, најзасегнатите чинители, националните и локалните телевизии, граѓаните, кои треба да бидат крајни корисници, па донекаде и надлежните институции, моментно се соочуваат со голем број нејаснотии и проблеми.

Процесот, според најавите од Агенцијата за електронски комуникации, дефинитивно, ќе започне во предвидениот термин и за тоа се веќе создадени сите предуслови. Сепак, телевизиите не го делат мислењето на АЕК. Веќе цела година трае дебатата за висината на таксата која треба да ја платат на новиот дигитален оператор „Оне“. Националните телевизии секоја година, за да бидат пренесувани преку дигиталната мрежа, ќе треба да плаќаат по 150.000 евра, а локалните кои имаат обврска да станат регионални по 20.000 евра. Многу е веројатно дека корекции на цената пред почетокот на дигитализацијата нема да има, барем според најавите на АЕК. Имено, регулаторот има надлежност да интервенира во тарифникот на дигиталниот оператор, но дури откако ќе започне процесот и откако ќе може да се согледаат реалните трошоци и на медиумите и на „Оне“.

Но, не е само финансискиот момент проблематичен. Главоболки на телевизиите им создаваат и техничките подготовки пред почетокот на процесот на дигитализацијата, како и несогласувањето со начинот на одржување на системот во иднина, за кој сметаат дека ќе биде уште поголем проблем за медиумите од финансиското оптоварување со високата такса.

И на крајот, тука се и граѓаните, кои треба да бидат крајни корисници во процесот. Дигиталниот сигнал би требало да биде бесплатен за сите, но, сепак, оние што немаат дигитален телевизор или соодветен ресивер ќе треба да инвестираат или во едното или во другото. Ресиверите чинат околу 10 евра и се поевтини. На одредени социјални категории граѓани ќе им бидат доделени бесплатно, но повеќето граѓани, за подготвено да ја дочекаат дигитализацијата, ќе треба да си платат.