На Македонија и' остана само Рикер во Вашингтон

Некои од важните позиции во Стејт департментот стојат празни со месеци, па и години

Заменик-помошникот државен секретар на САД, Филип Рикер, е единствениот функционер на чија помош може да се надева Македонија околу преговорите за името во Њујорк откако помошник државниот секретар за Европа, Филип Гордон, си замина од функцијата, а не е именуван се' уште негов заменик. Според реакциите на конгресмените деновиве во Вашингтон, во Стејт департментот има неодржлива ситуација на штета на американската надворешна политика, бидејќи не само таа на Гордон, туку стојат празни со месеци, па и години некои од важните позиции. Тоа беше причина неделава државниот секретар Џон Кери да се најде на удар на критиките на конгресмените, а тој се правдаше дека проблемот не е во Стејт департментот, туку во кочниците за именувањата од страна на Белата куќа. Моментно, покрај помошник државен секретар за Европа и за Азија, недостига и заменик-државен секретар за менаџирање, специјален преставник за Пакистан и Авганистан, специјален пратеник за Судан, помошник државен секретар за демократија и човекови права, помошник државен секретар за Африка, помошник државен секретар за правни прашања, за дипломатска безбедност и од идната недела и помошник државен секретар за политички и воени прашања. Со толку празни фотелји во американската дипломатија, која и онака е се' помалку фокусирана на регионот, Македонија тешко дека е сериозно на „радарот“ на Вашингтон. За ваквата состојба Кери доби гласна порака од медиумите дека нема место за „човек-дипломатија“ во комплексен свет каков што е тој денеска. Со оглед на тоа колку време троши Рикер на преговорите околу Косово, и дека речиси постојано е во Брисел, Македонија може да се надева само на ангажманот на еврокомесарот Штефан Филе. (С.Ј.)