Црвенковски нема да биде ни почесен претседател

На Кире Наумов не му се даваат сериозни шанси, засега се извесни кандидатурите на двоецот Зоран Заев и Радмила Шекеринска, Зоран Јовановски и Игор Ивановски

Горан Адамовски

Бранко Црвенковски најпосле заминува од политиката. Одлуката за повлекување им ја повторил на своите сопартијци на завчерашниот седница на Извршниот одбор на СДСМ. Било договорено Конгресот да се одржи на 2 јуни и тогаш ќе се избере новиот претседател. Засега се во игра три кандидатури: двоецот Зоран Заев и Радмила Шекеринска, Зоран Јовановски и Игор Ивановски.

Иако на „Бихаќска“ владее официјален молк, повеќе изв��ри од партијата потврдија дека Црвенковски се повлекува. Тој на сопартијците им рекол дека непотребно се напишале еден куп текстови околу тоа дали си заминува или не, се трошело премногу енергија во толкување на неговите зборови, а тој барем во четири наврати прецизно рекол оти нема намера да бара уште еден мандат.

Ќе си замине целосно или, пак, ќе биде лидер во сенка? Ќе биде ли избран за почесен претседател? Извори од партијата велат дека Црвенковски најавил целосно заминување од политиката. Според шпекулациите, дури и ќе биде пасивен при изборот на нов претседател.

„Ако навива за некој од кандидатите, тогаш се доведуваме во ситуација јавноста и нашите противници да го толкуваат новиот лидер како продолжена рака на Црвенковски и тоа да има негативен ефект. Затоа, како што сега стојат работите - тој нема да се меша во трката. Но, не како во 2004 година кога, исто така, рече секој да гласа по своја волја, а сепак неговите најблиски соработници во салата влегоа заедно со Бучковски. Не е одлучено дали ќе му доделиме некоја функција како почесен претседател, но, најверојатно, нема. Црвенковски и самиот не сака да се доведе во ситуација како што беше на времето во ВМРО-ДПМНЕ, кога почесниот претседател Љупчо Георгиевски примаше повеќе гости отколку Груевски. Од друга страна, Црвенковски, како поранешен претседател на државата, има свои простории во зградата спроти седиштето на СДСМ, значи кој сака може да дојде и во партијата и кај него“, тврдат нашите соговорници.

Според партискиот статут, актуелниот претседател ќе треба пред делегатите на Конгресот да реферира за изборниот пораз. Се очекува жестока дебата, оти во СДСМ признаваат дека грешки има кај сите - од раководството до месните комитети. Нема да има гласање за доверба, бидејќи на претседателот му истекува четиригодишниот мандат, а нов нема да бара. Интересно ќе биде како ќе се постават другите функционери во партијата. Тие велат дека не бегаат од преземање одговорност.

Сега на потег се општинските организации. Кандидирањето за нов лидер ќе оди преку нив. Досега, како што потврдија од партијата, се извесни три струи. Пратеничката Радмила Шекеринска има најголема поддршка од скопските комитети. Во тој случај Заев би бил претседател, оти кандидатурата мора да има едно име, а Шекеринска потпретседател. Тие ќе бидат тим, се укинуваат тројцата потпретседателски места. Координаторот на пратеничката група на СДСМ, Игор Ивановски е адут на Црвенковски. Предност на потпретседателот Зоран Јовановски му е економската стручност.

На ексдиректорот на Агенцијата за разузнавање Кире Наумов, кој самиот најави дека ќе се кандидира за претседател доколку се смени делегатскиот состав на Конгресот, не му се даваат сериозни шанси поради критиките кон актуелното раководство. Како притаен фаворит се споменува професорот Стево Пендаровски. Но, тој вчера ни рече дека нема амбиција да ја води партијата.

По седум едно по друго загубени изборни битки, СДСМ е пред сериозен испит како понатаму. На „Бихаќска“ апелираат до кандидатите да водат пристојна кампања и да внимаваат да не создадат раздор во партијата. Желбата е по 2 јуни, без разлика кој ќе победи, СДСМ да излезе како обединета партија.

Бранко Црвенковски е на чело на партијата од 1991 година. Единствено од 2004 до 2009 година, кога беше претседател на државата, на чело на СДСМ беа Владо Бучковски, Радмила Шекеринска и Зоран Заев, кој всушност беше в.д. претседател.