Стејт департментот со критики за собранискиот инцидент и медиумите

Објавен извештајот за праксата за почитување на човековите права, во кој се содржани бројни забелешки за состојбите во Македонија

Извештајот за праксата за почитувањето на човековите права на американскиот Стејт департмент за 2012 година содржи забелешки за македонската полиција, пред се за случајот Нешковски, потоа за владењето на правото и почитувањето на собраниските процедури, за состојбата во медумите, условите во македонските затвори, статусот на Ромите во оштеството, и други области.

Според извештајот, со кој Стејт департментот годишно ја следи состојбата во државите низ светот, за Македонија најсериозните забелешки се во областа на владеењето на правото, преку прекршувањето на собраниските процедури во случајот со инцидентот во Собранието на 24 декември.

Извештајот, јави известувачот на МИА од Вашингтон, наведува дека владејачкото мнозинство прескокнало неколку чекори од процедурата за гласање на буџетот, по што опозициските пратеници физички ја блокирале говорницата на спикерот, и биле отстранети од собраниското обезбедување заедно со новинарите од галеријата. Стејт департментот додава дека, по опозицискиот бојкот што следеше, Собранието изгласало неколку други контроверзни законски решенија.

Стејт департментот оценува дека во работата на полициските сили е присутно чувство на самоволие, наведувајќи го убиството на Мартин Нешковски, кое беше централна забелешка на минатогодишниот извештај. Стејт департментот нотира дека полицаецот кој го изврши убиството на Нешковски бил осуден на 14 години затвор.

Зеја Узра, помошник државен секретар во Стејт департментот за демократија, човекови прашања и труд, вчера на брифингот за претставување на извештаите, коментираше и за изоставувањето на прашањето со амнестијата за воените злосторства од извештајот.

Неодамна, амбасадорот на Стејт департментот за воени злосторства Стивен Рап, чија активност потпаѓа под истиот сектор на Стејт департментот, во изјава за МИА кажа дека македонското законодавство треба да ги процесуира воените злосторства од 2001 година, независно од која страна биле извршени.

Помошникот секретар Узра на прашањето за ставот на амбасадорот Рап изјави дека фокусот на извештајот за македонија за оваа година бил на друго место, на прашањата на владеењето на правото, собраниските процедури, медиумите и судството.

- Навистина е предизвик да се обидете секоја година да ги сумирате настаните во областа на почитувањето на човековите права во секоја држава во светот. Една работа што ја правевме во изминатите години е да го фокусираме извештајот кон развојот на настаните во календарската година. За овој конкретен случај немам дополнителни информации да ви дадам, изјави Узра за прашањето на воените злосторства. Таа најави помош од четири милиони долари за засилување на судските и полициските институции и градење на граѓанската свест за прашања од областа на владеењето на правото за подобрување на состојбата со владеењето на правото.

Инаку, извештајот за Македонија го следи текот или разврската на неколку позначајни судски процеси, како тие против Владо Бучковски, Васил Тупурковски и Љубе Бошкоски, за кого се наведува дека е обвинет за ново дело, двојно убиство во 2002 година. Во извештајот се наведува дека извори блиски на Бошкоски тврдат дека ова е политички мотивиран процес против него. Во извештајот се наведуваат и тврдења на одреден број претставници на судските власти дека Владата врши притисок врз нив, преку буџетските средства за судството.

Во сферата на медиумите, извештајот го наведува затворањето на телевизијата А2 поради неисполнувањето на потребните услови за работа согласно Советот за радиодифузија, оставката на главниот уредник на весникот Дневник и собраниските настани од 24 декември.

Во извештајот на Стејт департментот за соседна Грција се наведува дека грчките власти продолжуваат да го спречуваат регистрирањето на македонски и турски здруженија и организации. САД наведуваат дека Грција не го признава постоењето на македонското, како и на сите други малцинства во земјата, освен на муслиманското малцинство, како ни правото на употреба на македонски јазик од страна на нејзините граѓани, Македонци, за кои се вели дека се соочуваат со силни притисоци од сограѓаните - Грци. Наведен е процесот пред Европскиот суд за човекови права поради забраната на Грција да го дозволи отворањето на Домот на македонската култура во Лерин.

Во извештајот на Стејт департментот за Албанија, пак, е забележан инцидентот предизвикан од, како што се вели, крајно-националистичката група Црвено-црна алијанса, која во ноември упадна во гратчето Пустец извикувајќи про-албански пароли.

- Групата наводно влегла во општинската зграда и во етничко македонско средно училиште, заканувајќи им се на локалните граѓани. Групата ги покрила македонските имиња на уличните знаци, а потоа објавила фотографии од овие нејзини активности на фејсбук, пишува во извештајот за Албанија.