Мое ќоше

Влада од ��оверба

Ерол Ризаов

Сите си го добија своето што си го заслужија

Ете,бидна и тоа,го преживеавме гласањето за доверба на Владата,без поголеми гајлиња и стресови од оние што си ги имаме секој ден. Водно не се помрдна, а и Вардар иако многу опаднат во ова циганско лето, си тече спокојно.Сите си го добија тоа што си го бараа.

Социјалдемократите побараа гласање за доверба на Владата, велат потполно свесни дека нема да падне,бидејќи добро ги знаат односите на силите во Парламентот. Во недостиг на квалитетни дебати,полемики и при строго контролирани медиуми, тоа било ретка можност да се укаже дека земјата е во длабока економска криза, дека реформите не даваат резултати,дека безработицата и сиромаштијата растат незапирливо, дека нема ниту странски ниту домашни инвестиции, дека се запрени евроатланските интеграции и дека паѓаме во длабока економска и политичка рецесија. Го обвинија уште еднаш премиерот Никола Груевски дека инсталира режим рамен на диктатура.Ова сакаа да го кажат социјалдемократите и да поентираат пред јавноста со заедничкото гласање за доверба на Владата на ДУИ и на ВМРО-ДПМНЕ, дека двете партии се во спрега кога заеднички ги палат меѓуетничките огнови како единствено решение да се одржат на власт.

Опозицијата е убедена дека успеа да покаже пред јавноста оти има таен договор меѓу Ахмети и Груевски за случајот Слупчане и за Законот за бранители и за други меѓуетнички провокации кои секој ден се погласни и поопасни. Мобилизацијата на меѓуетнички и националистички позиции само да се освои власта и сочува рејтингот, веќе стана опасна работа за стабилноста на земјата, беше главната порака на социјалдемократите. Ете тоа сакаше да го каже СДСМ, а колку во тоа успеа кај пошироката јавност е сосема друго прашање.

Али Ахмети и Мендух Тачи, исто така, испратија пораки и тие си го добија тоа што си го бараа. Али Ахмети со својот став, кој знае по кој пат покажа дека ни на крај памет не му е да ја напушти Владата, освен ако Груевски го принуди на тоа. Или ако не му речат Американците дека е време да излезе од тоа друштво. Ги искара професорски социјалдемократите, колку да не му се лути партнерот од власта, а на Црвенковски му порача да не вреска многу оти утре задутре ќе мора да тропне на неговата врата бидејќи, нели,нема влада без Албанци. Го потсети Црвенковски со остри зборови и на перидот на неговото владеење кога Албанците се пренесуваа жедни преку вода со разни трикови без да им се даде ниту една отстапка, што според нив, ги принуди да одат во партизани 2001 година. ДПА на Мендух Тачи жестоко јава на бранот на натамошна радикализација на односите, не само меѓу албанските политички партии туку и ја прифати улогата на непосакуван политички партнер и од лево и од десно, и од Албанците и од Македонците.Ќе речете, по изборите кога радикалите ќе победат, стануваат меки. Да, тоа е точно, ама пораките што сега ги испраќаат, прават долгогодишни штети.

И ВМРО-ДПМНЕ и Никола Груевски имаат причина за задоволство. И тие добија тоа што сакаа.Наместо доверба на Владата, прикажаа, и тоа успешно, дека се Влада од доверба.Груевски објасни која е разликата меѓу него и Црвенковски. Дознавме дека голема била таа разлика. Црвенковски ги тепал Албанците во Гостивар и ги апсел. Го надул случајот со Агим Красниќи кој наводно го држел Скопје под закана, само да ја прикрие девалвацијата на денарот. Да, тоа е поголема разлика од сегашната тивка девалвација и тоа без заканите на Красниќи,разликата станува уште поголема меѓу Црвенковски и Груевски и со денешната рецесија, економска криза, од високата инфлација, од скокот на цените, повисок од оној Букефал на Александар Македонски на скопскиот плоштад. Разликата е и во тоа што веќе нема Албанци политички затвореници ,ама има Македонци. Како и да е, ВМРО-ДПМНЕ и Никола Груевски можат да ја продолжат својата постојана предизборна кампања, та имало, та немало избори.Никогаш не се знае кај Груевски кога ќе се одржат избори. Може и утре да ги распише ако му падне на памет.ВМРО ДПМНЕ и Груевски немаат гајле за избори. Секогаш имаат џокер во ракавот со некои гласови на мртви , или одамна исселени души кои се повампируваат од избори на избори. Додека не се исчисти тој список може секој ден да има избори.

А, што добивме ние кои со години на ред ги бираме нашите водачи и нашата власт и што добија тие што се постојано мнозинство а ги викаме неопределени. Во Парламентот, Владата доби доверба од 68 према 42 гласа. Надвор од Парламентот, што се вели во државата, според истражувањата на јавното мислење, сите политички лидери и сите политички партии заедно, онака топтан, немаат поддршка ниту од половината граѓани на Република Македонија. И тоа, според анкетите кои излегуваат од кујната на ВМРО-ДПМНЕ.

А има и нешто што навистина добивме. Уште еднаш одблизу ја добивме тажната слика на дострелите на нашите водачи и лидери и нивните скромни демократски капацитети, нивото на нивната политичка и комуникациска култура. Добивме и уште еден есенски бран на поскапувања. И толку.