Нема да бидам премиер по секоја цена

Груевски вели дека законот за бранителите треба да се донесе, но не и за таканаречените борци на ОНА

Премиерот Никола Груевски изрази благодарност за интерпелацијата зашто нејзиното поднесување, како што рече, ги исфрли на површина суштинските разлики меѓу ВМРО-ДПМНЕ и СДСМ. Потоа тој додаде:

Пратениците и членовите на СДСМ не се навикнати некој политичар да реагира принципиелно, да биде чесен и искрен. Вие се' гледате низ призмата на сценарија затоа што вашиот претседател на тој начин 20 години се одржува на политичката сцена. Мислите дека така треба, тој за вас е успешен човек. Сметате дека сите се такви, но грешите. Ние немаме никакво сценарио. Напротив, имаме принципиелни разлики кои се уште постојат, испливаа на површина и не се резултат на само еден настан, туку на повеќе.

Груевски рече дека не планира, ниту сака да биде претседател на Влада по секоја цена, да седи во фотелја и да прави секакви компромиси само за да ја задржи позицијата. Подготвен е, потенцира, и за избори, во ноември, декември, јануари, февруари, март. Додека сум премиер, сценарија нема да има. Можеби затоа ви е тешко да разберете многу мои постапки, затоа сте во иста ситуација и по седум години, со шест изборни порази. Токму затоа што сте такви народот ве казнува, рече Груевски.

Премиерот рече дека нашето општество е кревко и поради тоа мора внимателно да се постапува, а проблемите треба јасно и гласно да се кажат. Тој го повтори ставот дека законот за зајакнувања на правата на бранителите треба да се донесе, но не и за таканаречените борци на ОНА.

„Настанот во Слупчане беше контрапродуктивен и ако целта беше некакво помирување како што беше кажано потоа во јавноста, не се сфати така, туку како предизборна провокација. За мене тоа беше неприфатливо и веднаш го повикав министерот за одбрана, му го кажав тоа директно и жестоко реагирав на таквото однесување. Промената на таблите во училиштата по насилен пат е акт на провокација, ставањето провокативни имиња не придонесува во градењето доверба, како што не придонесува и незаконското менување на имињата со што се демонстрира непочитување на Уставот и законите“, рече Груевски.

За провкација, додаде тој, може да се смета и интонирањето на албанската химна при почетокот на учебната или студентската година. „2001 не е така далеку како што ни изгледа. Раните на двете страни се уште не се залечени и затоа мораме претпазливо и со почит кон другиот да ги креираме сите наши постапки. И да разбереме дека намерите се најчесни, најискрени и конструктивни, нивната функција нема поента ако со тие дела се повреди нечие чувство или нечие достоинство“, истакна премиерот.

Груевски рече дека Владата досега реализира над 2.300 проекти и уште преку 1.000 планира да спроведе, за сите нив дава отчет, а на изборите она што ќе го вети, го исполнува. Програмата е јасна, реална, а делата се видливи, конкретни. Токму тоа и останатите наши најавени силни мерки во економијата, елиминирањето на доцнењата на ДДВ-то, оргомните инфраструткурни објекти, автопати, гасоводи и централи за 2013 година, зголемувањето на пензиите и очекувањето дека Европската комисија ќе даде најпозитивен извештај досега, се причините за интерпелацијата. Тоа ви пречи, но за вашата одговорност сами треба да се свестите. Слушнав денеска многу празни зборови и многу искривени тези, но тие говорат за оние што ги изнесуваат. Јас зборувам јасно и со факти, рече Груевски.

Пред светската криза, додаде, Македонија имаше историски најголем раст од шест отсто, а лани во екот на рецесијата забележавме еден од најголемите растови во Европа. Во сложени услови успеавме да ја намалиме невработеноста од 39 на 31 отсто. Од 2006 до 2008 година во Македонија се реализирани гринфилд инвестиции од преку 1,5 милијарди евра, забележан е раст на платите од 52 отсто, а на пензиите од 35 проценти, додека за најмалите 42 отсто. Нивото на девизни резерви е најголемо досега и изнесува 2,1 милијарда евра, не зголемивме ниту еден данок, денарот е стабилен, рече меѓу другото Груевски.