Хасан Приштина крај „Мавровка“

Советникот од СДСМ во Чаир Борче Божиновски, тврди дека одлука за поставување таков споменик не е донесена

Татjана Поповска



Покрај училиштето Цветан Димов во Чаир, кое незаконски беше преименувано во Хасана Приштина, Скопје ќе добие уште еден споменик на овој албански политичар. Споменикот како што најавуваат од ДУИ, ќе биде поставен в недела, кај трговскиот центар Мавровка во близина на една од најфреквентните крстосници во градот. Споменикот е висок три метри, со постамент висок два метра.

Вчера во партијата на Али Ахмети немаа одговор на прашањата дали ова е уште една провокација на ВМРО-ДПМНЕ и дали на овој начин уште повеќе се оддалечуваат од коалицискиот партнер, со кој последниве месеци им се заострени односите, поради слични потези кои премиерот Никола Груевски ги оцени како провокација.

„Тоа е локална работа на општината. Нашиот став ќе го соопштиме откако ќе видиме за што се работи“, изјави вчера партискиот портпарол Бујар Османи.

Градоначалникот на Чаир Изет Меџити вчера не одговори на телефонските повици, за да информира дали поставувањето на споменикот е предвидено во годишната програма на општината и дали за тоа решавал Советот на општината.

Советникот од СДСМ во Чаир Борче Божиновски, тврди дека одлука за поставување таков споменик не е донесена.

„Советот не решавал за такво нешто. Ние во среда имаме седница и јас ќе го поставам тоа прашање. Таков споменик не смее да биде поставен без одлука на советниците“, вели тој.

Според информации од ДУИ, споменикот е донација на внукот на Хасан Приштина, Мехмет Приштина и чини околу 75 илјади евра. Пред една година сличен споменик беше поставен во Приштина, а во ноември такво дело ќе биде поставено и во Тирана.

Хасан Приштина е албански политичар, кој пред Првата светска војна има важна улога во албанското движење за независност.