Поглед

Брисел разочаран од грчкиот меморандум

Слободанка Јовановска

Дипломатите оцениле дека меморандумот на Атина не нуди ништо ново, освен ако не е начин да ја тргне блокадата од преговорите за Македонија



Грција изнесе на маса нацрт-меморандум на разбирање, очигледно со цел да се изнајде решение на нејзиниот долгогодишен спор со името со Македонија, но дипломатите во ЕУ изразија разочарување од неговата содржина, во која велат дека нема нови предлози, се вели во весникот „Еурактив“.

Во нацрт-меморандумот се повторува дипломатскиот јазик што веќе се користи во билатералните документи, а околу прашањето за името се наведува дека „каков било предлог треба да содржи јасна и дефинитивна географска одредница“ и дека „договореното име ќе се користи од сите и за сите цели“.

Весникот оценува дека останува нејасно дали Грција ќе ги повлече своите приговори за Македонија да започне пристапни преговори со ЕУ во случај да биде потпишан меморандумот, дури и ако се оддолжат разговорите за изнаоѓање заемно прифатливо име.

Дипломат на ЕУ за „Еурактив“ изјавил дека „не гледа ништо ново“ во грчкиот документ и дека пошироко во Брисел тој се смета како „разочарување“.

Според овој дипломатски извор, Грција може да биде доведена во искушение да ги деблокира пристапните преговори со Македонија потпишувајќи го меморандумот, само за да „биде задоволно“ нејзиното европско семејство. Но, тој додава дека не е во интерес на грчката Влада да го дополнува јавното незадоволство со компромис за прашањето за името, што националистите во земјата би го гледале како навреда.

Тајмингот на меморандумот очигледно би и' помогнал на Европската комисија да ја реафирмира европската перспектива на Македонија. На 10 октомври извршното тело на ЕУ треба да ги објави своите годишни извештаи за напредокот – или недостигот од напредок – на земјите кандидати за ЕУ, заклучува весникот.