Мое ќоше

Груевски го притисна Уставен

Ерол Ризаов

Непочитување на одлуките на уставните судии е репресија

Премиерот Никола Груевски истрела силен рафал против Уставниот суд. Со видлива нервоза ги деградира уставните судии со јавно жигосување дека работат ��од притисок. Овој пат пресијата била од моќните кодоши. Претседателот на Владата изјави во Битола: „Уставен суд донесе одлука под притисок на кодошите да се урне процесот на лустрација. Ова го направиле луѓе кои биле кодоши во минатото... “

Јас, пак, наивен мислев дека Уставниот суд е под постојан притисок на власта и на премиерот Груевски, кој сите одлуки што не му се по ќеф жестоко ги пречекува како непријателски акт против државата. Цело време бев во заблуда дека големите кодоши си нашле безбедно прибежиште скриени и онемени во скутот на власта. А, оно гледај тие биле инсталирани во непријателските редови и се уште толку моќни да влијаат на одлуките на Уставниот суд. Да видиш, да не веруваш. Конечно, кој го ферма Уставниот суд. Таа доктрина Владата ја воспостави уште со самото доаѓање на власт. Може Уставниот суд да си донесува какви сака одлуки, но Владата си има свои патишта како да си ги оствари своите цели. Нервозата доаѓа оттаму што премиерот многу се вознемирува кога Уставниот суд ќе соопшти дека некои владини закони не се според Уставот.

И нормално, кога премиерот ќе се онеспокои, настанува стампедо во редовите на македонската преродба. Сите што побрзаа да соопштат дека ќе ги почитуваат одлуките на Уставниот суд добија уплав од лутината на лидерот, па на врат - на нос се коригираа поради својата непромисленост. Претседателот на Комисијата за лустрација експресно ја повлече својата изјава дека веднаш ќе ја почитува мерката на Уставниот суд. Така мислел до вчера, ама денес веќе има нова визија тоа да го направи откако одлуката ќе се објави во „Службен весник“. А дотогаш ќе протече многу вода по Вардар. Пред тоа вообичаено први се огласија трубите на власта дека од земјата ќе направат Кодошистан и сите досиеја ќе и' ги стават на увид на јавноста, па народот нека чита и ужива кој кого кодошел во изминатите 70 години. Ами како. Ќе се насладуваме неколку години во црнилата што ги оставиле зад себе кодошите на селската левица, а потоа кога ќе дојде до промена на власта, ќе се соблазнуваме со злоделата на граѓанската десница. Така во наредните децении сите г...а ќе испливаат на површина. Тоа е една од најголемите придобивки на демократијата што би рекол светски познатиот словенечки филозоф Славој Жижек.

Премиерот има свои советници кои добро знаат зошто постои Уставниот суд, кои се работните задачи на уставните судии и каков треба да биде односот на македонската Влада со Уставниот суд. Овие правни експерти не смеат да го оставаат премиерот на тенок мраз да дава такви изјави во јавноста. Тие мора да му кажат дека уставните судии не судат и не пресудуваат дали треба лустрација или не треба, дали треба, ова или она. Уставниот суд постои како сегде во светот да не се носат противуставни закони. Таа институција која го штити Уставот, всушност, го штити правниот поредок во земјата. Уставот е мајка на сите закони. Тоа е конститутивен акт и темел на општеството на економскиот и политичкиот систем на Македонија. Света и работна должност на уставните судии е да го бранат правниот систем и уставноста. Ако и ова не помага, тогаш е неопходно на премиерот да му се даде да прочита нешто што многу едноставно, јасно и разбирливо го напишал еден од нашите најголеми правни авторитети - академик Евгениј Димитров веднаш по конституирањето на независна Република Македонија: „Владеењето на правото е суштествен сегмент на демократијата. Надвор од демократијата принципот на владеење на правото преставува гола форма и може да се трансформира во инструмент на присила, репресија и диктатура. Основна функција на владеење на правото е ограничување на политичката власт и обезбедување ефикасна заштита на човекот и на неговите слободи и права“.

Ова што се случува во Македонија се' почесто со деградацијата на Уставниот суд и одлуките на уставните судии е класичен случај на непочитување и на правната држава и на човековите права и слободи. Тоа е злоупотреба на власта за присила и репресија. Убеден сум дека, сепак, ова го знае нашиот премиер. Да не е така, не би градел во центарот на Скопје толкав Уставен суд со оние импозантни антички столбови и колонади кои треба да влеваат сигурност дека имаме силен гарант на демократијата и правото. Или, пак, Вие мислите дека тоа е за друга намена.