Во Чикаго повторен заклучокот од Букурешт



Македонија не доби ни покана ни ново охрабрување, туку уште некои услови

На Македонија во Чикаго и го повторија Букурешт: уште пред претседателот Ѓорѓи Иванов да побара почитување на хашката пресуда, лидерите на земјите членки на НАТО заклучија дека условот што ни го дадоа во 2008 година и натаму останува. Од велелепниот конференциски центар денеска не стигна велелепна вест, како што впрочем не се ни очекуваше во земјава, а нема ни деталји дали некој воопшто на главната расправа го отворил прашањето со Македонија, поинаку освен формално.

Во поздравните обраќања не ни се случи ни изненадувањето од Стразбур, односно претседателот на САД Барак Обама не покажа со гест или со изјава дека се уште се надева дека Македонија брзо ќе стане членка на алијансата. Генерално владееше молк на тема Македонија, а шефот на делегацијата, претседателот Иванов одеше по цркви и училишта или се среќаваше со тие кои и пред тоа ни даваа поддршка во билатералните контакти, т.е. функционерите на Словенија и Турција. Во завршниот документ НАТО ни порача нам, а со тоа и на Грција, дека треба да си го решиме спорот околу името, па и повеќе од тоа - побара да се интензивираат напорите а преговорите да продолжат без одлагање.

„Покана за БЈРМ ќе има веднаш штом се постигне заедничко прифатливо решение за името, во рамките на ОН и силно повикуваме на интензивирање на тие напори. Брзо решение ќе биде проследено со членство кое ќе придонесе за стабилноста во регионот. Ги охрабруваме преговорите и нивното продолжение и очекуваме тие да завршат што е можно побрзо“ е заклучокот во завршното коминике од Чикашкиот самит.

Потоа, побара продолжување на реформите и изградба на мултиетничко општество, елемент што го немаше во Букурешт, Стразбур и Лисабон. На позитивната страна, ако може да се нарече така, НАТО ни порача дека вратата за нови членки е отворена, дека го цени учеството на Македонија во мисиите на алијансата и ја вреднува долгорочната посветеност на определбата за прием во НАТО. Генерално, во заклучоците НАТО порача дека на Балканот, како стратегиски регион, се важни демократските вредности, регионалната соработка и добрососедските односи, па така нашиот услов се издигна на повисоко, регионално ниво.

„Ги поздравуваме долгорочната посветеност на земјата во процесот на пристапување кон НАТО“, стои во коминикето од Чикаго