Грција е уверена дека нема да има изненадувања за Македонија во Чикаго

Шефот на дипломатијата, Ставрос Димас, не отстапува од ставот дека Хашката пресуда нема да влијае на промената на одлуката од Букурешт за прием на Македонија во НАТО

Од нашиот дописник
Миркица Поповиќ



Атина - Грција не покажува знаци на растревоженост во врска со прашањето за приемот на Македонија во НАТО на престојниот самит на Алијансата во мај. Грчките медиуми ги критикуваат последните изјави на македонскиот премиер Никола Груевски кој тврди дека нема комуникација со Грција, додека пак министерот за надворешни, Ставрос Димас тврди дека и покрај Хашката пресуда во НАТО нема да има изненадувања за Грција.

Димас во интервју за солунскиот весник „Македониа“ потенцира дека најсилниот македонски аргумент односно одлуката на Меѓународниот суд на правдата од Хаг нема никакво влијание на едногласната одлука на НАТО од Букурешт за членството на Македонија во Алијансата, и нема да влијае на нејзина промена. „Одлуката од Букурешт, како и одлуките од другите самити на НАТО се јасни, едногласни и ја претставуваат целосно волјата на Алијансата. Пресудата од Хаг нема никаква врска со начинот на носење одлуки на НАТО. Имаше голема и добра подготовка изминативе месеци во пресрет на Чикаго, исто како што имаше подготовка за справување со пресудата од Хаг, односно со позитивни резултати за Грција затоа што едногласните одлуки на ЕУ и НАТО останаа исти по пресудата во декември“, вели Димас.

Шефот на грчката дипломатија инсистира дека она што ја интересира Грција е наоѓање на заеднички прифатливо решение. Димас испрати порака дека се надева политичката порака која ќе биде испратена до нашата држава во Чикаго да помогне за македонската влада да почне да настапува поконструктивно на преговарачката маса по самитот на Алијансата.

Грчкиот весник „Катимерини“ ги оцени изјавите на премиерот Груевски, со кои премиерот упати критика до грчката влада дека нема комуникација која би довела до решение, како обид за извртување на вистината и префрлање на топката на одговорноста кон Атина. Причината за ваквиот однос на Груевски според грчкиот весник се негативните пораки кои ги добива македонската владата за можноста нашата држава да добие покана за членство во НАТО. „Очигледно средбите меѓу министрите од двете влади за премиерот Груевски не се бројат како комуникација меѓу двете страни“, посочува „Катимерини. Повикувајќи се на дипломатски извори, весникот оценува дека од македонската влада треба да се очекува зголемена ваква реторика пред НАТО самитот во обид да се промени одлуката од Букурешт и да се добие зелено светло за членство на самитот во мај. Посочуваат дека и атмосферата на министерскиот состанок на НАТО во Брисел минатата недела не изгледала многу оптимистички за Македонија.

„Грчката влада сепак не ја исклучува можноста во Чикаго да биде отворено прашањето за членство на БЈРМ од држави кои ја поддржуваат како Турција, Словенија, Британија и Канада. Меѓутоа грчката страна има добиено потврда дека дури и да биде отворено прашањето, нема да добие никаква поддршка“, пишува „Катимерини“.

Авторот на интервјуто со претседателот Ѓорѓе Иванов во „Катимерини“, Ставрос Ѕимас во својата колумна во весникот повторно се осврнува на ова интервју и пораките кои излегуваат од него. Забележувајќи дека на голем дел од читателите не им се допаднало тоа што прашањата не биле доволно остри или нападни, Ѕимас коментира дека сепак од интервјуто произлегува едно друго значајно прашање за каналите на комуникација меѓу граѓаните од двете држави. Ѕимас упатува критика што грчките и македонските политичари многу ретко се отворени за интервјуа со медиумите од другата страна. „Се поставува прашањето зошто го избегнуваат ова. Не сметаат дека е корисно да проговорат на општествата кои се во конфликт? Што би им наштетило на политиката на Самарас, Венизелос или Папуљас да се обратат до граѓаните на БЈРМ преку нивните медиуми и да ги објаснат детално и јасно грчките позиции за да се разјаснат било кои извртувања на вистината? Дали некој верува дека би можело да се направат храбри одлуки за решавање на спорот за името без да се има добро информирана јавност наместо исфанатизирана, игноранта јавност и од двете страни?“, забележува тој во „Катимерини“.