Ќе предизвика ли раскол чистката во ВМРО-ДПМНЕ?

И по шест години практикување на власта, во владејачката партија се чуваат под „тепих��� нeзадоволствата и разногласијата

Александра М. Митевска



Раководството на ВМРО-ДПМНЕ не очекува внатрепартиски раскол, по кадровските смени што почнаа да ги реализира една година пред новите избори. Упатените во случувањата во партијата велат дека тоа, сепак, не значи дека, по шест години практикување на власта, нема незадоволство и разногласија во редовите на ВМРО-ДПМНЕ - и меѓу членството, главно, на локално ниво и меѓу функционери кои покриваат одредени области и се упатени на соработка. Само што конфронтациите и манфестациите на незадоволство се одвиваат далеку од очите и ушите на јавноста.

ВМРО-ДПМНЕ, деновиве, се обидува да ја претстави „генералката“ во своите редови како акција која има за цел мобилизација на ново членство и освежување на структурите на власта. Илија Димовски, директор на Центарот за комуникации на ВМРО-ДПМНЕ, вчера, упати апел до сите граѓани да се приклучат кон „новиот бран“.

„Се охрабруваат сите оние кои сметаат дека се квалитетни и може да помогнат да се приклучат кон партијата, а и да аплицираат по институциите за раководни места на огласите. Изборот ќе биде според материјалните закони од соодветната институција и во изборот ќе учествуваат стручни тимови“, рече Димовски.

Функционер на ВМРО-ДПМНЕ наведува најмалку три причини поради кои се цени дека не постои опасност од поголеми искричења во партијата поради промените што се преземаат: Премиерот и лидер на ВМРО-ДПМНЕ, Никола Груевски и натаму е неприкосновен меѓу своите сопартијци, а долгото опстојување на врвот на власта му ја олеснува таквата позиција. Поради тоа, ретки се оние кои би се осмелиле да манифестираат фракционерство на отворена сцена. Исто така, можноста за приклонување на поголем дел од членството кон друга политичка опција е сведена на минимум, по ударите што, по последните парламентарни избори, им беа нанесени на помалите партии на десницата, преку неутрализирање на ОМ и Достоинство, ослабување на ВМРО-НП и спојување на Демократската десница со ВМРО-ДПМНЕ. Третата, но, можеби, најсуштинска причина е таа што смените во ВМРО-ДПМНЕ, најчесто, не значат целосно дистанцирање на одреден функционер, туку само негово преместување на друга позиција и отворање простор за сместување на друг партиски кадар.

Во изминатите шест години, ретките кадровски смени зафатија и личности од најтесното раководство на ВМРО-ДПМНЕ, но тие рокади не се изведуваа толку гласно, како што е сега случај со „новиот бран“. Поранешниот потпретседател на ВМРО-ДПМНЕ, професорот Трајко Славески, е еден од ретките што јавно се спротистави на неговото разрешување од министер за финансии, додека други министри и носители на функции, главно, тивко заминуваа меѓу два изборни циклуси или поднесуваа оставки, за потоа да бидат назначени на други места. Љубиша Георгиевски, на пример, беше претседател на Собранието, па стана амбасадор во Белград. Антонио Милошоски не беше избран за министер за надворешни работи во третиот кабинет на Груевски, но му припадна да ја раководи собраниската Комисија за надворешна политика...

Од директорската функција, сега, заминува Влатко Чинговски, кој во сите овие години владење на ВМРО-ДПМНЕ беше на чело на ЕЛЕМ. Иако од поодамна се зборуваше дека Чинговски се спрема да биде прв амбасадор на Македонија во Јапонија, бидејќи таму докторирал и живеел осум години, за јавноста беше изненадување што токму тој се најде прв на удар. Чинговски долго време беше член на Извршниот комитет, највиското тело на ВМРО-ДПМНЕ, а на изборите во 2006 беше позициониран високо на кандидатската листа за пратеници, но се повлече за да биде директор на ЕЛЕМ. Неочекувано дојде и оставката на Наташа Волканова од директорската позиција во Агенцијата за железнички сообраќај, бидејќи таа важеше за долгогодишна блиска соработничка на Груевски. Заминувањето од челното место во Антимонополската управа на Чедомир Краљевски, кој своевремено се врати од ВМРО-НП во ВМРО-ДПМНЕ, пак, се поврзува со потребата да се најдат позиции за новите личности кои му свртеа грб на поранешниот премиер Георгиевски.