Јатото не (с)лета во НАТО, туку во Брисел

Водечкиот македонски лобист за Алијансата и некогашен истакнат член на левицата, Лазар Еленовски, пакува куфери за во европската политичка метропола

Слободанка Јовановска


„Бранот“ на ВМРО-ДПМНЕ навлезе силно и во дипломатијата, па двајца бивши функционери на СДСМ ќе одат како претставници на Македонија во странство со благослов на владејачката партија. Како што се дознава, на списокот за амбасадори, што бил прифатен од владата прексиноќа, се нашле имињата на Јован Донев како наш иден претставник во Велика Британија и најголемото изненадување, Лазар Еленовски, како наш иден амбасадор во Брисел. Каде во Брисел, не можеше да се добие сигурна потврда вчера, со оглед на информацијата дека на листата на амбасадори се нашло и името на Абдулкадар Мемети, исто така за белгиската престолнина! Со оглед на тоа дека Андреј Ле��авцов неодамна замина како амбасадор во Европската унија и нема најави дека ќе се враќа, испаѓа дека „бранот“ го зафати амбасадорот Мартин Треневски, кој како што се дознава неофицијално, нема да биде вратен назад, туку ротиран на друга дестинација. Практично, нов македонски амбасадор во НАТО, откако Треневски не успеа да ја реформира Алијансата и да и' го смени консензусот како начин на гласање, ќе биде ексминистерот за одбрана и прв човек на Евроатлантскиот клуб на Македонија, Еленовски. Од владини извори изјавуваа дека списокот е државна тајна, но секогаш беше така, а вака ревносно досега не се криеја имињата од јавноста.

На списокот за идни амбасадори фигурираат и имињата на Паскал Стојчевски од МНР како амбасадор во Канбера, Абдулкадар Мемети ќе го замени Мухамед Халили во амбасадата за Белгија, а неофицијално амбасадор ќе биде и Кенан Рамадани, актуелен шеф на протоколот на МНР како предлог на ДУИ, покрај Влатко Чингоски како прв македонски амбасадор во Јапонија. На седницата на владата не биле пополнети сите испразнети амбасадорски фотелји, па нов список ќе биде усогласуван понатаму. Како што е познато, од јуни ќе бидат празни амбасадите во Хрватска (за каде што се планира претседателката на Унијата на жени на ВМРО-ДПМНЕ Даниела Караѓозоска), амбасадите во Шпанија и во Романија, мисиите на Македонија во ОН во Женева и во Стразбур (за каде што се врти името на Ненад Колев, кадар на МНР) и најжешката - амбасадорската фотелја во САД. За неа ќе се усогласува кандидат подоцна, бидејќи амбасадорот Зоран Јолевски доби продолжување на мандатот до крајот на оваа година.

Инаку, Јован Донев е актуелен прв човек на институтот „Евробалкан“, кој во последно време важеше за евроскептик и анти-НАТО аналитичар со тврди погледи кон спорот за името, кој е од најзвучните левичарски имиња што се престроија десно на политичката сцена. Лазе Еленовски беше дел од кампањата чиј слоган беше „Со јато во НАТО“, па ако се потврди дека заминува таму, треба да значи позитивен пресврт во споредба со ставовите на Треневски. Паскал Стојчески е актуелен државен секретар во МНР за билатерални односи со воневропските земји кој еден мандат помина во амбасадата во Вашингтон на пониско скалило, додека Абдулкадар Мемеди е државен советник за односи со европските земји, а во јавноста стана познат по неколку епизоди, а пред се' по белешките на амбасадорката Џилиан Миловановиќ од кои стана јасно дека немал кочница што критикувал и за што.