Поглед

Детонација на тишината

Горан Адамовски

Што се случи со „��етонатор“? Акцијата за рачистување на криминалот во Источна Македонија одамна не е на менито на властите и на јавноста. До детаљ следените активности во големата акција, за која понекогаш се организираа и по две прес-конференции на ден, веќе ги нема во агендите.

Тишината ја прекинаа најавите од судот дека можеби и судија е вмешан во матните бизниси.

За волја на вистината, „Детонаторот“ беше преклопен од трагичниот настан кај Смилковското езеро. Целото внимание на полицијата се фокусира таму за да се најдат суровите убијци, а и јавноста, сосема логично, го пренасочи интересот кон ова незапамтеното злосторство.

Но, тоа не значи дека веќе не треба да се работи на случајот, кој беше поздравен од мнозинството граѓани. Токму и поради нив, полицијата има задача да ги открие одговорите на клучните прашања, кои неколкупати си ги поставија и самите: како тоа покер-апаратите биле прошверцувани во земјава и со чија поддршка се одвивал нелегалниот коцкарски бизнис. Надлежните најавуваа дека помагатели на криминалците ќе се бараат и во Царината, полицијата, судството и обвинителството. Нема да се заштити никој. Кој се офајдил со нечисти пари, сега ќе одговара.

Но, времето врви, резултати нема. Досега акцијата резултираше единствено со смени на полициски функционери, за кои нема докази дека соработувале со криминалците, но се виновни што пред нос им се случувал Лас Вегас. Имаше и апсења на поситни играчи, но главните риби уште се' во вода. Да не испадне дека во помалите градови во земјава, каде секој се знае со секој и каде секој знае се' за секого, немало кој да види и да чуе за коцкарскиот бизнис.