Новиот бран влезе во „Бихаќска“

ВМРО-ДПМНЕ, во платен оглас, ги анализира луѓето околу Црвенковски, кои ги смета за „непроменливи и вечни“, иако шест години се во опозиција

Владејачката ВМРО-ДПМНЕ влезе во нова пропагандна кампања против СДСМ, етикетирајќи повеќемина актуелни и поранешни функционери на сегашната опозиција како „непроменливи и вечни“. Во екот на кадровските рокади во владејачката партија, наречени „нов бран“, ВМРО-ДПМНЕ во медиумите објавува огласи со фотографии и куси биографии на актуелни пратеници, поранешни министри, директори и обвинители, како и на амбасадори од времињата кога на власт беа социјалдемократите, кои се во опозиција од 2006 година.

Вкупно 28 лица, меѓу кои и лидерот на СДСМ, Бранко Црвенковски, се најдоа на списокот на личности што, според ВМРО-ДПМНЕ, 20 години биле во високата политика, а зад себе не оставиле „ниту една мерка, ниту е��на крупна реформа, ниту едно трајно дело“. Целта на владејачката паартија, судејќи според огласот, е да каже дека нема разлика меѓу СДСМ во 1992 и СДСМ во 2002 и во 2012 година.

СДСМ се огласи со коментар со само една реченица, оценувајќи дека платените огласи на ВМРО-ДПМНЕ се „жално потрошени пари“.

Дел од личностите посочени во комерцијалниот оглас на ВМРО-ДПМНЕ повеќе години не се активни на политичката сцена, ниту, пак, се многу присутни во јавноста. Но, ним како „грев“ им се припишува тоа што влегле во советите што СДСМ ги основаше во изминатите неколку месеци.

Во огласот што осамна вчера, во дел од печатените медиуми, како вечни и непроменливи се споменуваат и кардиохирургот Борче Петровски, адвокатите Стеван Павлески и Стерјо Зиков, амбасадорот Виктор Габер, универзитетските професори Атанас Вангелов, Таки Фити, Добринка Тасковска... Но, има и имиња на актуелни пратеници на СДСМ, како Радмила Шекеринска, Игор Ивановски, Јани Макрадули...

Социјалдемократите се воздржаа од повеќе коментари за платениот оглас на ВМРО-ДПМНЕ, но затоа подетално ги анализираа новите владини предлози за амбасадори, посочувајќи ги како доказ дека “новиот бран е истата стара приказна на Никола Груевски“.

„Погледнете ги само новите предлози во димпломатијата. Сите се кој од кој помлад, посвеж и поодморен“, иронизираше секретарот на СДСМ, Андреј Петров. Тој го нарече Слободан Чашуле амбасадор уште од комунизмот и човек за сите партии. За Јован Донев рече дека е дежурен бранител на ВМРО-ДПМНЕ, а за Панде Лазаревски дека бил функционер за сите системи.

„За да го надгради и прошири новиот бран, Груевски од нафталин ги извади и Филип Петровски и Лазе Еленовски. Не знаеш кој повеќе партии и државни функции сменил “, рече Петров, кој посочи и дека Груевски е човекот кој во изминатите 20 години најдолго бил во власта, четири години како министер и шест години како премиер. (А.М.М.)