26.04.2012, 12:57 Сорос: Економската криза може да ја урне Европската унија
Американскиот милијардер и инвеститор Џорџ Сорос уште еднаш го активира „алармот“ во Европа, изјавувајќи дека економската криза би можела да ја урне Европската унија. „Европа е слична на СССР на начин што кризата во еврозоната има потенцијал да ја уништи Европската унија“, изјавил Сорос. Тој споредувајќи ја ЕУ со СССР од 80-тите години на минатиот век, истакна дека со длабока социјална, економска и морална криза во која е Европа би можеле да видиме сличен процес на распаѓање.
Со масовна невработеност и пад на приватната потрошувачка, кризата во еврозоната се' уште е жива и не се гледа нејзиниот крај, пишува весникот „Вашингтон пост“. Весникот наведува дека европските земји, иако воведоа штедење во своите пресметки со цел да ги намалат долговите, овие мерки во голем број економии предизвикаа дополнителен пад. „Нереди избувнаа во голем број земји, најмногу во Грција, која е најтешко погодена од должничката криза во еврозоната“, наведува весникот. Распадот на СССР се поврзува со корупцијата и сериозните економски проблеми кои со години се негирани и прикривани од Комунистичката партија. Поради тоа граѓаните ја загубија довербата во системот и тој се распадна. Сорос во своите излагања многу често ја поврзува сегашната криза со распадот на комунизмот пред 20 години. Во интервјуто за „Њусвик“ Сорос го споредува зголемувањето на падот на довербата на граѓаните дека светските пазари можат самостојно да се регулираат со падот на комунизмот.
Сорос, пред неколку месеци, ги критикуваше фискалните политики на голем број светски лидери и предупреди дека тие би можеле да доведат до класна војна, особено во Европа. Според него, мерките за штедење во време на слаба побарувачка ќе ги намалат платите и ќе ја зголемат невработеноста, што може да резултира со репресии над народните маси од страна на политичките лидери.
|
