26.04.2012, 15:38 „Новиот бран“ ги повикува сите кои се за подобро општество
Од ВМРО-ДПМНЕ ги охрабруваат сите оние кои мислат дека можат да дадат придонес во таа насока да аплицираат на огласите за раководните места ќе бидат зафатени од промените
Новиот бран на промени што го најави ВМРО-ДПМНЕ и кој веќе почна да се реализира, според партијата има за цел да мобилизира, соединува, да донесе свежина, дополнителен раст и да создава успеси. Затоа, од ВМРО-ДПМНЕ ги повикуваат и охрабруваат сите оние кои мислат дека можат да дадат придонес во таа насока да аплицираат на огласите за раководните места ќе бидат зафатени од промените.
- Овој процес нас не соединува со граѓаните од нашето секојдневие. Затоа ве повикуваме да се приклучите! Се охрабруваат сите оние кои сметаат дека се квалитетни и може да помогнат да се приклучат и кон партијата, а и да аплицираат по институциите за раководни места на огласите. Изборот ќе биде според материјалните закони од соодветната институција и во изборот ќе учествуваат стручни тимови. Знаеме дека ова некому ќе му изгледа преамбициозно, дури и неостварливо, знаеме дека некои ќе се обидат да го девалвираат овој потфат или да го обезвреднат, но ние од тоа не се плашиме и тоа не не колеба, рече на денешната прес-конференција Илија Димовски, Директор на Центарот за комуникации на ВМРО-ДПМНЕ.
Тој додаде дека во изминатиот период многумина се сомневале во многу работи, но биле демантирани. - Успевавме во работи кои изгледаа неостварливи во изминатиов период. Приклучете се. Има уште доста предизвици пред нас, и ние сме свесни за проблемите со кои се соочуваат нашите сограѓани, но верувајте - Ќе успееме! Македонија ќе успее!, рече Димовски.
Тој истакна дека промените се неопходни да за се дојде до успех во сите сфери.
- Успехот е резултат на голем број правилно донесени одлуки. Успехот е резултат на континуирани промени и учење од сопствените грешки. Успехот е резултат на постојаната потрага по ново, на постојана работа и надоградување, на постојано освежување и реформа, на желбата и волјата да се направи подобро за граѓаните и да се биде подобар од конкурентите. Да се постави пример како се организира политичка партија, како се подготвува програма, како се исполнуваат ветувањата, како се држи до зборот, како да се даде отчет пред сопствениот народ, рече Димовски.
Според него, иако во минатиот период ВМРО-ДПМНЕ вложила голема енергија за да ги реализира ветувањата на изборите и направила многу со реализација на околу 2.000 проекти, мерки и реформи во сите области, сепак, како што рече, има простор за уште, потребно е уште повеќе и дека партијата тоа го знае бидејќи го слуша сопствениот народ.
- Наша цел е континуитет во реформите, постојаност во силата со која се спроведуваат проектите и мерките. И тука нема застанување. Нашата цел е секогаш подобра и по просперитетна Македонија! Новиот бран, кој го промовираме е тежнеење кон овие цели. Со Новиот бран, партијата добива димензии на движење, тоа е момент кога продолжуваме со мобилизација, кога продолжуваме со нашиот познат интензитет, продолжуваме со освежување на капацитетите и потенцијалите, со реорганизација на структурата, продолжување со нашиот начин на работа, со постојано подобрување, со зголемување на ефикасноста кон граѓаните, со исполнување на нивните очекувања, со надминување на предизвиците и справување со пречките, кои се воочени, но и со многу нови мерки и реформи, кои ќе дадат нова вредност на нашето живеење, рече Димовски.
Никогаш не сме велеле дека се ќе подобриме и решме, но, додаде, ќе направиме максимум за да ја продолжиме нашата посветеност, работа и труд, ќе ги остваруваме нашите ветувања, реформи и предвидени мерки, за да овозможиме подобар живот на граѓаните и зад нас да оставиме трајни дела.
|
