26.04.2012, 12:05 Машина за правење тули згмечи ресенчанец
Ресенчанецот Едис Бекировски (26) е најновата жртва при несреќен случај на работно место
Ресен - Ресенчанецот Едис Бекировски (26) е најновата жртва при несреќен случај на работно место. Младиот ресенчанец бил згмечен од машина за правење тули, нарекувана оџак, во фабрика за производство на градежни материјали. Несреќата се случила вчера околу 19 часот кога Бекировски бил втора смена на работа во фабриката „Нова Слога 2007“, лоцирана на патот од Ресен кон село Болно.
Работејќи како раководител на втора смена, младиот ресенчанец настрадал откако се вклучил алармот од соседната машина на која работел, а на која само кусо време пред тоа работел на нејзина поправка. Така отишол крај машината со намера да го поправа сензорот, но во еден момент се вклучил друг сензор, кој ја активирал машината и таа со долниот дел го притиснала работникот во пределот на главата и горниот дел од телото.
„Откако го забележале тоа, неколкумина колеги му пришле на помош, успеале да го извлечат од под тешката машина и со тешки повреди да го пренесат во Здравствениот дом во Ресен. Но откако лекарите констатирале дека состојбата е крајно критична, решиле да го транспортираат до Клиничката болница во Битола, но на пат за Битола им подлегнал на повредите“, вели Ѓоко Стрезовски, портпарол на СВР Битола.
Полицијата заедно со истражен судија излезе на местото на несреќата, а увид изврши и трудовата инспекција. Бекировски бил во редовен работен однос. По барање на истражен судија, обезбедени се снимки од безбедносните камери лоцирани во работните простории, како и целокупната техничка документација со цела да се провери исправноста на машинскиот парк. (А.Б.)
|
