Книгите ги раскараа основачите на ВМРО-ДПМНЕ

Гојко Јаковлески во писмо до јавноста упати канонада обвинувања за книгата „Борис Змејковски - современиот Дамјан Груев“ од Бранислав Синадиновски, што беше објавена неодамна

Даниела Трпчевска

Нови обиди да се разгори расправата околу основачите на ВМРО-ДПМНЕ и нивната улога во зацврснувањето на партијата. Гојко Јаковлески од Берлин, кој тврди дека е основач на ВМРО-ДПМНЕ, во писмо до јавноста исфрла канонада обвинувања за книгата „Борис Змејковски - современиот Дамјан Груев“ од Бранислав Синадиновски, што беше објавена годинава. „Книгата е полна со невистини, лаги, без срам и перде, и авторот во неа се обидува целосно да ја прекрои историјата на основањето на ВМРО-ДПМНЕ, да се внесе како идеолог, заедно со уште двајца, што е ноторна лага. Оние вистинските, пак, кои вложиле труд и пари се збришани“, пишува Јаковлески, додавајќи дека „никој, па и некојси Бранислав Синадиновски, некогашен амбасадор на СФРЈ, кој кариерата ја градел како комунист, со оваа книга не ќе може да ја изопачи вистината, да го замаи народот и да се прогласи како еден од идеолозите на ВМРО-ДПМНЕ“.

„Не, господине Синадиновски, ти не си идеолог на ВМРО-ДПМНЕ и да напишеш уште илјада книги, не можеш да бидеш тоа што не си“, упатува порака Јаковлески и додава дека постои само една вистина за формирањето на ВМРО-ДПМНЕ. „Татко на ВМРО-ДПМНЕ, нејзин идеолог е исклучиво само Драган Богдановски, друг не постои. Тоа треба да им биде јасно на сите. Програмата и Статутот на партијата се дело на Богдановски, кои беа објавени во новогодишниот број на весникот „Млад борец“, декември 1989 година“, вели Јаковлески.

Според него, авторот на речиси 400 страници се обидува вистината за партиј��та целосно да ја промени, и покрај тоа што има куп документи и многу живи учесници, активни пред одржувањето и на самото Основачко собрание. Тој смета дека на овој начин се прави обид со фалсификат да се преправи историјата.

„Во уводниот дел авторот нагласува дека целта на книгата е младите генерации да ја дознаат вистината за личноста и делата на Борис Змејковски, како и за другите тројца идејни творци на ДПМНЕ – Драган Богдановски, Костадин Диневски-Динката и д-р Бранислав Синадиновски. Ако навистина целта е вистината да допре до младата генерација, зошто не ја пишува вистината, туку се служи со тежок фалсификат, со фабрикување лаги, измислува личности, настани и што уште не“!

Раскажувајќи за неговото пријателство со Драган Богдановски, тој вели дека во 1990 година добил повик од него за да го запознае со идејата за формирање на ДПМНЕ. „Средбата со македонските патриоти кои ќе се вклучат во реализацијата на идејата за формирање партијата се одржа во Минхен на 31 мај 1990 година. Покрај мене, на состанокот присуствуваа Драган Богдановски, Љупчо Георгиевски, Борче Змејковски и Владо Транталовски. Меѓу другото, дискутиравме и за името на партијата. Мојот став беше дека пред ДПМНЕ не треба да стои префиксот ВМРО, бидејќи овие четири златни букви не треба да се користат за политички цели и на првите парламентарни избори мое мислење беше дека и без префиксот ќе постигнеме голем успех. Драган ме праша дали се согласувам Љупчо Георгиевски да биде претседател на партијата. Му забележав дека е многу млад и имав резерва дека ќе може успешно да раководи со партијата. На ова ми одговори дека е млад, многу интелигентен, има харизма и е прав војвода!“, пишува Јаковлески.

Според него, на средбата во Минхен биле договорени сите детали за одржување на Основачкото собрание на ВМРО-ДПМНЕ во Скопје на 17 јуни 1990 година, но во книгата сето тоа било прескокнато да се спомене.

„Змејковски и С��надиновски намерно ја избегнуваат вистината да им ја соопштат на читателите, не ги спомнуваат фактите за да можат да ја пласираат конструираната лага и невистина. Господинот Борче Змејковски несомнено има големи заслуги за формирањето на општинските комитети на ВМРО-ДПМНЕ во градовите и во селата во Македонија, меѓутоа неговото ниво на образование во тие години и како возач на Динката реално немал капацитет и време да биде идеолог на партијата“, тврди Јаковлески.

Препукувањето меѓу некогашните основачи на партијата трае веќе подолг период, а продолжува да се разгорува откако годинава беа објавени неколку книги во кои се зборува за битните моменти од формирањето на ВМРО-ДПМНЕ и за клучните случувања околу осамостојувањето на земјава.

Неодамна во јавноста излезе и книгата на Љупчо Георгиевски, еден од основачите и долгогодишен лидер на ВМРО-ДПМНЕ, кој во неа објаснува важни моменти од осамостојувањето на државата, но и се присетува на моментите кога се родила идејата за политичко дејствување, идејата за формирање на ВМРО-ДПМНЕ и првото Основачко собрание во Скопје. Георгиевски во книгата наведува дека Змејковски и Богдановски, заедно со него, го понеле најголемиот товар за формирањето на партијата.


Змејковски: Шпиони на УДБА се претставуваат како основачи

Борис Змејковски вели за „Утрински весник“ дека е беспредметно да дава какви и да е коментари за „вакви натрапници“. „Ако е некој фалсификатор, тогаш токму тие се оние што ја фалсификуваат историјата. Би го запрашал само Јаковлески дали постојат некакви документи за неговата улога во партијата? Илузорно е да се занимавам со вакви обвинувања. Најголемите профитери, кодоши и шпиони на УДБА сега тврдат дека се основачи на партијата. Во сите документи јас фигурирам како генерален секретар на партијата од нејзиното основање. Колку и да се трудат, не можат да направат фалсификат на таа вистина“, одговара Змејковски на обвинувањата упатени од Гојко Јаковлески.