Разногласие во Министерството за одбрана за Слупчане

На офицерите треба да им „суди“ Воената дисциплинска комисија формирана од МО, така што евентуална прекршочна мерка, всушност, ќе треба да изрече оној што ја дал наредбатата

Наум Котевски



Ако се точни шпекулациите дека пред заминувањето на премиерот Никола Груевски на роуд-шоуто во Канада и во САД, ВМРО-ДПМНЕ и ДУИ се договориле да ја стишат ситуацијата по настанот во Слупчане, кој предизвика (случајна или смислена) криза во владејачката коалиција, тогаш може слободно да ги прогласиме претседателот Ѓорге Иванов и Министерството за одбрана за минери на „тајниот план“. Најновите дисонантни тонови околу случајот со положувањето цвеќе на споменикот на загинатите борци на ОНА вчера дојдоа од ресорот одбрана. Првин заменик-министерот Емил Димитриев, во изјава што ја пренесе МИА, рече дека очекувано, оправдано и основано е поведувањето дисциплинска постапка против униформираните лица кои заминаа во Слупчане заедно со својот претпоставен Фатмир Бесими.

„Нарушување на работната дисциплина во која било институција не е дозволено и е казниво. Дисциплинскиот престап во Армијата не само што не е дозволен туку претставува кршење на едно од основните начела на функционирање на оваа институција“, рече Димитриев. Кратко потоа, Министерството за одбрана го демантираше својот втор човек, потврдувајќи дека првиот човек Бесими поинаку гледа на работите. „Министерството за одбрана смета дека нема прекршување на процедурите. Ставот на Министерството за одбрана е познат за настанот во Слупчане и веќе не го коментираме“, велат од МО, притоа упатувајќи ги сите заинтересирани институции на законите за одбрана и за служба во АРМ. „Доколку се достави каква било иницијатива, Министерството за одбрана ќе ја разгледа соодветно согласно со законските прописи“, додаваат од Министерството.

И претседателот и врховен командант на вооружените сили, Ѓорге Иванов, не попушта во својот став за Слупчане, веројатно проценувајќи дека токму за овој случај, а не, да речеме, при потпишувањето на Законот за лустрација, треба да го демонстрира својот претседателски инает и цврст карактер. На празникот Голема Богородица, Иванов повтори дека униформираните лица кои го следеа министерот Фатмир Бесими во положувањето цвеќе на споменикот на загинатите борци на ОНА мора да понесат одговорност.

„Станува збор за лица од Министерството за одбрана, односно од Кабинетот на министерот кои ја злоупотребиле армиската униформа и довеле до заблуда дека Армијата присуствува на тој чин. Се иницираа сите процедурални активности и се очекува против тие лица да биде преземена одговорност, бидејќи е строго пропишано кој и кога може да носи униформа“, потенцираше Иванов, без да спомене некаква можна одговорност во пакет - дисциплинска за офицерите, а политичка за министерот, за барем вешто да ги демантира аналитичарите кои со денови предупредуваат дека и во овој случај ќе го настрадаат извршителите, а не и идеологот.

Можеби таквата нелогична дистинкција во контекст на одговорноста кај помалите и повисоките ешалони Иванов ја прави како дел од пораката до ВМРО-ДПМНЕ и ДУИ дека само со дијалог може да го решат проблемот. Иако е сосема јасно дека станува збор за класична контрадикција. Имено, не може претседателот искрено да повикува на дијалог и помирување меѓу коалициските партнери, а симултано да бара да одговараат „следбениците“ на Бесими.

Генералот во пензија Благоја Марковски се согласува дека униформираните лица кои биле со Бесими во Слупчане треба да одговараат, но потенцира дека тоа е нелогичен епилог доколку тој што ја дал наредбата не одговара политички. „Нема дилеми. И униформираните лица во Кабинетот на министерот се лица од Армијата. Тие ги уживаат сите права како другите припадници на АРМ, но ги носат со себе и сите одговорности пропишани со законот. Тоа што тие го направија е дисциплински прекршок, бидејќи не влегува во описот и пописот на нивните задачи. Конкретно, за положување цвеќе е задолжен баталјонот за почести, односно бившата армиска гарда, кој е обучена за таа работа. Факт е дека тие лица ја примиле наредбата од министерот Бесими, но можеле да го опоменат“, смета Марковски, кој потенцира дека ним треба да им суди Воената дисциплинска комисија формирана токму од Министерството за одбрана. Генералштабот на АРМ само може да поднесе иницијатива до Министерството, но не и да одлучува за евентуалните казни.

Така, според него, се доведуваме во ситуација прекршочната мерка да треба да им ја изрече оној што ја дал наредбата. „Тоа нема да се случи. Тој што им наложил сигурно нема да ги казни“, вели Марковски, за кого Законот за бранители поднесен од ВМРО-ДПМНЕ претставува само одмазднички потег.

„Тој Закон ќе го продлабочи јазот. Ако кризата е реална, а не фингирана, напнатоста нема да се намали. Напротив, ќе се зголеми. ДУИ ќе мора да ја напушти Владата, бидејќи ќе нема простор за попуштање“, смета Марковски.