Трае сообраќајниот грч на „Првомајска“

Граѓаните се исплашени за својата безбедност и реагираат на брзоплетото проширување

Бојан Шашевски

Продолжува хаосот на улицата „Првомајска“ во Кисела Вода. Се' уште е вистински терор да се минува по едно од поголемите градилишта во градот. Особено откако работите се интензивирани и се работи истовремено и на коловозот и на тротоарите, па по правливата улица не се знае кој каде минува и кој има предност, дали автомобилите или пешаците.

Градоначалникот Коце Трајановски неодамна ја посети „Првомајска“ и се пофали дека и покрај одредени проблеми кои се појавиле при реконструкцијата на сообраќајната артерија, со дополнителни напори ќе успеат да завршат пред утврдениот рок за изградба. Тоа значи уште побрзо и поинтензивно копање, бидејќи новоименуваната „Борис Трајковски“ есенва треба да биде претворена во проточен булевар. До тогаш возачите, велосипедистите, моторџиите и пешаците ќе бидат во тотален сообраќаен грч. Впрочем, како и цело лето. Кошмарот со минувањето улицата без тротоари, недогледливите колони, нервозното свирење, маглите од прав станаа дневна рутина на локалните жители и оние што работно циркулираат низ Кисела Вода.

Бескрајно долго пеколно лето за граѓаните од оваа општина. Свесни се дека откако ќе завршат градежните зафати ќе биде максимално растоварено движењето, но тоа треба да се издржи. Истовремено се исплашени за својата безбедност, бидејќи градежните работи се изведуваат без да биде обезбедена заштита за учесниците во сообраќајот. Луѓето реагираат на начинот на кој е организирана работата, особено на брзоплетото работење, кое не само што создава уште поголем метеж, туку може да придонесе и за неквалитетна изведба.

„Насекаде има дупки и земја. Расфрлан градежен материјал, огромни камења, разни жици, цевки. И тоа по местата за пешаци, па дури до зградите, пред самите влезови. Каде се тротоарите? По улица ли да се движиме, која и онака е стеснета? Ни се темни кога ќе помислиме дека треба да одиме кон центар. Неиздржливо е веќе... Да траеше една, две недели, но мислам дека се претера и веќе се претвори во изборна активност. Премногу се форсира копање и асфалтирање, а ние мораме да трпиме. Се губи смислата на градежната акција ако се дејствува на повеќе делови одеднаш“, смета Елена Стоматоска, жителка на општина Кисела Вода.

На делот на „Првомајска“ кај општинските бараки моментално работат камионите и багерите на „Жикол“. Еден од работниците вели дека нивните екипи секојдневно се караат со огорчени возачи и минувачи, но мораат да си ја завршат работата навреме.

„Знам дека сме трн во око за многумина. Им пречиме и на автомобилите и на автобусите. Но, работата не може да чека. Гледате и самите дека се работи со полна пареа. Плус, има пеколни жештини, па двојно сме ангажирани во попладневните термини“, вели работникот кој сакаше да остане анонимен.

Тој објасни дека од „Жикол“ се задолжени за раскопувањето, за шахтите и инсталациите околу коловозите, додека екипите на „Алпине бау“ за поплочување и асфалтирање.

Од Град Скопје веќе неколку пати соопштија дека градежните работи се одвиваат според динамиката планирана со роковите во изведбениот проект. Интензивните зафати ги оправдуваат со можноста „Првомајска“ да биде во оптимална возна состојба пред зимските месеци, со што ќе се избегнат големите метежи и ќе има нормални услови за сообраќај. Како поволна околност за забрзувањето на летните градежни активности ја посочија намалената фреквенција на граѓаните поради годишните одмори и апелираа до учесниците до сообраќајот да се придржуваат кон поставената сигнализација и да бидат трпеливи уште малк��.

Инаку, во должина од 2,5 километри проектот на градските власти предвидува реконструирање на две делници од сообраќајницата, од „Рампа“ до раскрсницата со улицата „Народни херои“ и од раскрсницата со булеварот „Србија“ до влезот на поранешна „Стакларница“. Со реконструкцијата новоименуваната „Борис Трајковски“ ќе има четири коловозни летни, широки по 3,5 метри, пешачка и велосипедска патека, ново осветление, атмосферска канализација, клупи, канти за отпадоци, дрвореди. Проектот е вреден 4 милиони евра.