11.05.2012, 21:28 Грчкиот политички трилер продолжува
Венизелос не успеа да формира влада, Грција е на чекор од нови избори
Од нашиот дописник
Миркица Поповиќ
Атина - Ни од трет пат Грција не успеа да добие влада. Лидерот на ПАСОК, Евагелос Венизелос не успеа да добие зелено светло на неговиот план за формирање заедничка влада со десничарската Нова демократија и двете партии од левицата СИРИЗА и Демократска левица. Алексис Ципрас, лидерот на СИРЗА со своето "не" стави крај на обидот за формирање заедничка влада. Венизелос се очекува утре да го врати мандатот за формирање влада кај грчкиот претседател Каролос Папуљас. Тешката штафета преминува кај грчкиот претседател. Според грчкиот устав откако ќе пропаднат обидите на лидерите на трите најпопуларни партии, следниот чекор е заедничка средба на претседателот со лидерите на сите партии кои освоиле пратенички места во грчкиот парламент. Се очекува во текот на викендот или во понеделник Папуљас да ги повика лидерите на седумте партии кои влегоа во новиот грчки парламент во обид да се договори влада. Меѓутоа ретко кој очекува чудо од лидерската средба кај Папуљас. Она што за многумина веќе е извесно се нови избори во јуни.
Ципрас беше човекот кон кого беа свртени погледите во текот на целиот ден. Неговото климнување или вртење на главата беше пресудно за разрешување на дилемата нова влада или нови избори. Венизелос заедно со лидерот на Нова демократија, Адонис Самарас и Фотис Кувелис од Демократска левица го ставија Ципрас пред свршен чин- заедничка влада или избори. Тројцата лидери преку своите изјави во текот на денот упатија обвинување кон Ципрас дека со својата популистичка реторика наместо да помага ја влошува ситуацијата на Грција во очите на меѓународната јавност. Кувелис, Самарас и Венизелос успеаа да се најдат на иста линија за формирање влада за национално единство која ќе работи да го осигура останувањето на Грција во еврозоната, а негативниот одговор од Ципрас го засили нивниот аргумент дека лидерот на партијата од левицата користејќи се со популистички методи ја втурнува Грција во нови избори и дополнително губење на време во критични моменти.
Лидерот на СИРИЗА по средбата со Венизелос, со која се заокружи обидот за формирање влада, остана на ставот дека ниту Венизелос ниту Самарас се уште не ја разбрале пораката од изборите односно одлуката на народот да го заврти грбот кон пакетот мерки за штедење договорен со ЕУ и ММФ. Одбивањето на Ципрас да соработува со тројцата лидери не наиде на големо изненадување во јавноста. Граѓаните сметаат дека по исходот од вонредните избори на 6 мај на кои СИРИЗА за прв пат се искачи до второто место, Ципрас уште посамоуверено ќе се бори на следните избори да биде прв и да проба да формира влада од партиите од левицата. Првите резултати од нови анкети за рејтинзите на партиите покажуваат дека рејтингот на СИРИЗА е во пораст и партијата на Ципрас е на прво место пред Нова демократија на Самарас, додека пак ПАСОК се на третото место.
|
