10.05.2012, 13:27 Попоски во посета на Луксембург и на Белгија
Министерот за надворешни работи на Република Македонија, Никола Попоски, денеска и утре ќе престојува во работна посета на Големото Војводството Луксембург и на Кралството Белгија.
Во рамки на посетата на Војводството Луксембург, министерот Попоски, покрај средбата со својот колега, министерот за надворешни работи, Жан Аселборн, ќе биде примен и од премиерот на Луксембург, Жан Клод Јункер.
Македонскиот шеф на дипломатијата ќе оствари средби и со претседателот на Парламентот на Војводството Луксембург, Лорен Мозар, и со претседателот на Комисијата за надворешни работи на Парламентот, Бен Фајо.
При посетата на Кралството Белгија, министерот Попоски ќе оствари средба со министерот за надворешни работи на Белгија, Дидиер Рејндерс, како и со претседателите на Комисиите на надворешни работи на Сенатот и на белгискиот Парламент.
На средбите, соопшти МНР, ќе се разговара за билатералните односи, како и за можностите за нивно продлабочување.
Во фокусот на разговорите ќе бидат и аспирациите за членство на Република Македонија во Европската Унија и во Северноатлантската Алијанса, со акцент на очекувањата по пресуда на Меѓународниот суд на правдата во Хаг.
За време на посетата, министерот Попоски ќе учествува на трибина во Прес-клубот Европа во Брисел, при што ќе има обраќање на тема „Проширувањето на Европската унија, од македонска перспектива“.
Планирано е министерот Попоски да оствари средби и со македонската дијаспора која живее во Белгија и во Луксембург.
|
