10.05.2012, 14:34 Од дрво во училиштен двор паѓаа пари
КАВАДАРЦИ - Купчиња пари се разлетале од дрво во училиштен двор во Кавадарци. Учениците, играјќи фудбал, со топка го погодиле дрвото, по што паднале банкноти со денари. Децата се исплашиле, некои дури велат и дека парите биле завиткани во крвава маица. Веста бргу се прошири низ Кавадарци, сите се во неизвесност кој ги скрил парите. Од полицијата го потврдуваат случајот, но барем засега, се отфрлаат сомневањата дека станува збор за украдени пари, бидејќи кражба не била пријавена.
Според информациите од полицијата, случајот го пријавила наставничка со нејзините ученици. Надлежните излегле на терен, извршиле увид и пронашле 10.400 денари и 10 евра.
„Во моментов се работи на утврдување на потеклото на парите по што ќе се знае кој ги оставил и зошто“, велат од полицијата. (А.Д.)
|
