Трета среќа за нова грчка влада



Штафетната палка по Самарас и Ципрас денеска му беше предадена на Венизелос.

Од нашиот дописник
Миркица Поповиќ

Атина - Гордиевиот јазол за формирање грчка влада тешко се разврзува. Лидерот на ПАСОК и поранешен министер за финансии, Евагелос Венизелос ќе си ја проба среќата да формира нова грчка влада. Обидот на Венизелос е трет по ред за формирање коалициска влада за спас на државата по неуспешните обиди на неговите противници Адонис Самарас, лидерот на Нова демократија и Алексис Ципрас од левичарската СИРИЗА да најдат заеднички јазик и да ги испеглаат разликите со останатите политички партии. Историската шанса да се формира влада на левицата на Ципрас пропадна. Грција веќе една недела е во безизлезна ситуација околу идното владино раководство по катастрофалните резултати на вонредните парламентарни избори на кои ниедна политичка опција не освои доволно гласови за самостојно да формира влада. Јавноста е се поубедена дека сите обиди се залудни и народот повторно ќе излезе на избори следниот месец.

Лидерот на ПАСОК по преземањето на мандатот-штафета од претседателот Каролос Папуљас истакна дека планира да се сретне со сите лидери на партии и да поразговара со нив околу можноста за формирање влада. Венизелос истакна дека не се изјаснува како оптимист, меѓутоа има одговорност и ќе се обиде да направи што може за да се најде нова влада. Неговата главна цел е формирање на влада која ќе ја осигура иднината на Грција во еврозоната. Лидерот на ПАСОК е убеден дека и со ваквиот парламентарен состав и досегашните несогласувања има основа да се формира влада доколку политичките лидери покажат волја за тоа. Венизелос во своите разговори со лидерот на СИРИЗА, Ципрас околу историската шанса да се формира влада на левицата предложил да се формира влада за национален спас од СИРИЗА, Демократска Левица, ПАСОК и Нова демократија или пак доколку Ципрас има одржлив план за излез од економската криза да го презентира тој и да формира влада од левицата која ќе биде поддржана од ПАСОК. И по овој пропаднат обид, Венизелос сепак ќе се обиде уште еднаш да се сретне со сите лидери и да формира влада со проевропски предиспозиции за национален спас.

Венизелос за денеска попладне имаше предвидено средба со лидерот на Демократска Левица, Фотис Кувелис, а утре ќе се сретне и со неговиот најголем противник Самарас. Во медиумските кулоари кружеа гласини дека лидерите може да предложат влада ПАСОК, Демократска Левица и Нова демократија која би ја предводел Кувелис како премиер. Гласините не добија некоја посериозна потврда во текот на денот, особено ако се има предвид дека Кувелис истакна по изборите дека не би сакал да прави влада со партиите кои го имаат потпишано договорот за штедење.

Од Демократската левица му забележаа на Ципрас што не успеал да ја искористи можноста да формира влада и со неговите активности и инсистирањето за откажување од пакетот за штедење ја става државата пред свршен чин за распишување нови.

Грчките новинари и експерти кои будно ги следат политичките случувања не го менуваат почетниот став дека државата ќе има нови избори во јуни.