Се забранува групирање во набавките во здравството

Во јавните набавки во државното здравство се забранува групирање на повеќе артикли во еден лот, односно тендерите ќе мора да се распишуваат така што за еден артикл да има еден лот. Оваа е најновата мерка на Министерството за здравство за спроведување на тендерите во јавните здравствени установи (ЈЗУ), со кои се планира да се постигне поголема ефикасност во работењето, поголема конкуренцијата и транспарентност, како и намалување на цените на артиклите.

„Доколку постои посебен лот за набавка на секој артикл, ќе се постигне пониска цена при набавката. Оваа мерка ќе се применува само за нови јавни набавки, додека тековните тендери кои се веќе потпишани ќе се реализираат онака како што се потпишани“, рече министерот Никола Тодоров.

Според него, со ова укажување им забранува на установите да набават артикли спротивно на овој принцип. „Исто така се забранува да се преземат артикли од друг оператор, како Заеднички служби или централна набавка на повеќе установи или дури и Министерството за здравство да набавува централно, доколку не се набавени според овој принцип. Еден артикл - еден лот“, потенцира Тодоров.

Новата мерка може да го одолжи процесот на набавки затоа што ќе зема повеќе време, но Тодоров смета дека и тоа може добро да се испланира за навреме да се спроведе набавката.

Наскоро ќе се воведе и е-систем за мониторинг на набавките на лекови, а во моментов 158.590 артикли веќе се внесени во овој систем. (Ј.Ј.В.)