Петок краен рок за деблокирање на Комисијата

На средбата меѓу премиерот Груевски и лидерот на СДСМ, Заев, било договорено да се вложат последни напори за расветлување на настаните од 24 декември

Наум Котевски

ВМРО-ДПМНЕ и СДСМ ќе вложат последни напори за деблокирање на К��мисијата за настаните од 24 декември и пронаоѓање излез од статус кво состојбата во која таа е заглавена по оставката на претседателот Борче Давитковки и несогласувањата меѓу двете парти за правните формулации во извештајот. Во заедничкото усогласено соопштение лиферувано по денешната 45-минутна средба во Владата меѓу премиерот и лидер на ВМРО-ДПМНЕ, Никола Груевски, и лидерот на СДСМ, Зоран Заев, се најавува интензивирање на процесот и донесување конечно решение околу извештајот на Комисијата за настаните на 24 декември, како последен обид за постигнување договор, чие евентуално недонесување ги загрозува европските перспективи на Македонија.

На средбата посветена само на процесот околу расветлување на настаните на 24 декември се размениле повеќе ставови од двете страни, при што се договорило досегашниот краен рок за постигнување согласност за извештајот на Комисијата, 14 август, да се пролонгира и тој да биде до петок, 23 август 2013 година, по што доколку не биде постигната согласност, ќе се смета дека не може да се постигне конечно решение.

Инаку, денешната средба меѓу Груевски и Заев се одржа по барање на премиерот, а по неа немаше официјални изјави, ниту, пак, им беше дозволено на фоторепортерите и снимателите да го овековечат состанокот.

Поканата од премиерот до лидерот на СДСМ стигна само ден откако Груевски рече дека ВМРО-ДПМНЕ како партија нема да остане нем набљудувач и доколку во наредните денови не се најде решение, односно СДСМ не ја деблокира Комисијата, ќе размисли за нови чекори и нови стратегии кои ќе бидат сосема различно од она што е сега. Во најавената нова стратегија на премиерот, кој вината за блокирање на Комисијата ја лоцираше кај екслидерот на СДСМ, Бранко Црвенковски, некои препознаа директна закана до опозицијата со предвремени парламентарни избори, кои најдоцна би се одржале заедно со претседателските во април идната година.

Иако во СДСМ постојат различни мислења за степенот на конструктивноста на нивниот лидер, поради зачестените напади од Груевски, сепак, Заев одлучи да одговори на поканата, велејќи дека треба да му се даде уште една шанса на дијалогот.

„Постои уште една шанса за разговорите. Официјално до 24 август се' уште е отворена можноста да се донесат заклучни согледувања и препораки како извештај од работењето на Комисијата за настаните на 24 декември“, рече Заев пред почетокот на средбата.

Според наши информации, денеска во земјава требаше да дојдат двајцата претставници од Европската унија кои ја набљудуваа работата на Комисијата. Резултатите од работата на Комисијата се очекуваат и во Брисел од каде што во повеќе наврати предупредија дека од успехот на работата на Комисијата зависи и тонот со кои ЕК ќе го пишува новиот извештај за напредокот на Македонија, кој ќе биде објавен во почетокот на октомври.