Коњановски го нуди „Криволак“ за вежби место Лерин

Премиерот и министерот денес со Шефер ќе разговараат за името и за буџетот на АРМ

Од нашиот дописник
Слободанка Јовановска

БРИСЕЛ - Место да ги тепа и апси Македонците што се противат на воените вежби, Грција може да вежба на „Криволак“, и' порача вчера од Брисел министерот за одбрана, Зоран Коњановски, на Атина.

„Жал ми е ако се случиле такви нешта, а сигурно се случиле. Што можам да кажам јас како министер за одбрана освен тоа дека, доколку армијата на Грција има потреба за вежбовни активности, ние и' стоиме на располагање со нашиот воен полигон „Криволак“. Таму во секое време можат добро да се обучат војници за испраќање во мировни мисии“, изјави Коњановски по средбата со словенечкиот амбасадор во НАТО.

Со него тој ја почна серијата средби во Алијансата, која ќе кулминира денес, со заедничка средба на министерот и на премиерот Никола Груевски со генералниот секретар Јап де Хоп Шефер и со американскиот амбасадор Култ Вокер. Теми се името, намерите на Македонија во однос на активностите во Алијансата и буџетот за одбраната, при што последните две се поврзани со очекувањата и барањата од НАТО- контингентите од Ирак да се префрлат во Авганистан.

Иако Коњановски вчера тоа не го потврди сосема, веќе се договара војниците што ќе бидат повлечени наскоро од Ирак да бидат преупатени во Авганистан, со што нашето присуство таму ќе се зголеми за една третина, или од 130 на 200 војници. Според Коњановски, во моментов се прават анализи во Министерствата за одбрана и за надворешни работи околу големината на контингентот за Авганистан, како резултат на извесното повлекување од Ирак по барањето на тамошните власти да ги преземат работите во свои раце. Одлуката за редуцираниот буџет на АРМ тој, пак, ја бранеше со оцената дека во моментов Македонија наменила над два отсто од БОП за оваа цел, што е стандард за сите земји-членки на НАТО.

„Само шест земји, вклучувајќи ја и Македонија, имаат околу 2,3 отсто од БОП наменет за набавка и одржување на опремата во одбраната. Ние ги имаме тие два и повеќе проценти, и како и да биде проектиран буџетот, па и тој за идната година, Македонија ќе има повеќе од 2 отсто“, изјави Коњановски.

Прашан која е целта на средбата на премиерот Груевски со Шефер денес (премиерот ќе се сретне и со Хавиер Солана), министерот одговори дека таа е во рамките на нормалните контакти на нашиот државен врв со генералниот секретар, иако последните месеци тие баш и не можеа да се опишат така. На средбата со словенечкиот амбасадор било отворено и прашањето за името, на што министерот реплицирал дека македонскиот став е јасен, дека очекуваме спорот да се реши, и на крајот за решението да се изјаснат граѓаните на референдум. Но, додаде тој, знаете дека во НАТО се одлучува со консензус. На словенечкиот амбасадор Коњановски, сепак, му потврдил дека Македонија останува на цврстата определба за целосно вклучување во Алијансата и дека тој правец јасно се гледа од штотуку презентираната годишна програма.