Металург СЕХА ќе ја игра во Велес

Металурзите ја разгледуваат опцијата своите натпревари од регионалната лига да ги игра во овој град

Регионалната Газпром лига, лани позната како СЕХА, за новата сезона постави услови за клубовите речиси еднакви на тие кои ЕХФ ги бара во Лигата на шампионите. Салата „Автокоманда“ не може да ги исполни, па Металург бара алтернатива, друг град. Најверојатно, тоа ќе биде Велес.

СЕХА годинава во условите со кои ги обврзува учесниците во регионалниот шампионат има поставено и стандард во каква сала може да се играат натпреварите. Покрај специјалната подлога, се бара и поставување на рекламно лед-пано и капацитет на салата од минимум 1.500 седишта плус 500 за стоење или сала со најмал капацитет за 2.000 гледачи.

Металург побара да му биде дозволено да игра во „Автокоманда“, која освен за ЛШ ги исполнува ЕХФ-критериумите, но тоа, најверојатно, нема му биде дозволено. Понудена опција му беше „Кале“, домот на Вардар, но од повеќе причини Металург не сака да игра на тој терен, а „Борис Трајковски“ е прескап за играње на регионалниот шампионат.

Тука почна потрагата по алтернативно решение. Скопје нема друга сала, па затоа се бара друг град. Во опција има повеќе решенија, но, најверојатно, џек-потот ќе оди во Велес. Под услов локалните власти да препознаат интерес и да се вклучат во целиот проект. Од нив и не се бара којзнае колку, но ќе треба да помогнат во шминкањето на салата и обезбедувањето услови во нивниот град. (Р.Ѓ.)