Во Египет вонредна состојба, најмалку 149 загинати во Каиро

По крвавите настани потпретседателот Мохамед Ел Барадеј поднесе оставка, а во земјата е воведена вонредна состојба

Потпретседателот на Египет Мохамед Ел Барадеј поднесе денеска оставка заради несогласување со одлуката на властите насилно да ги урнат протестните кампови на приврзаниците на соборениот од власт претседател Мохамед Морси во Каиро, што предизвика судири во кои загинаа најмалку 149 луѓе. Оставката ја образложува во писмо до привремениот претседател Адли Мансур.

- Ми стана претешко и понатаму да носам одговорност за одлуки за кои не се согласувам и од чии последици стравувам. За жал, од денешните случувања профитираат само оние кои повикуваат на терор и насилства, а тоа се екстремистичките групи, наведува тој.

Бројот на убиени во Египет се зголеми на 149 лица, повредени се 1.403

Бројот на убиени во денешните судири во Египет се зголеми до 149 луѓе, додека бројот на повредени е 1.403, објави Министерството за здравство.

Вршителот на должност претседател Адли Мансур претходно воведе вонредна состојба во државата за еден месец и полициски час во 11 провинции од 19 часот по локално време до шест часот наутро.

Муслиманско братство тврди дека бројот на загинати е 220 и над 8.000 повредени.

Египетските безбедносни сили утрово нападнаа два големи импровизирани кампа полни со поддржувачи на соборениот претседател Мохамед Морси, срамнувајќи ги шаторите со булдожери и протерувајќи стотици демонстранти.

Во рок од три часа од упадот, силите го расчистија помалиот од двата кампа - кампот „Нахда“, во близина на кампусот на Универзитетот во Каиро. Но, поголемиот - во близина на џамијата „Рабаа ал-Адавија“ во источниот дел на Каиро - се покажа посложен, а силите се соочија со жесток отпор. Војската ги повика своите специјални сили.

Белата куќа остро се спротивстави на воведувањето вонредна состојба

Вашингтон остро се спротивстави на воведувањето вонредна состојба во Египет.

Портпаролот на Белата куќа Џош Арнест рече дека насилството означува непочитување од страна на преодната власт во Египет.

Тој ги повика воените лидери на Египет да ги почитуваат основните човекови права на граѓаните на Египет и нагласи дека насилството само го отежнува враќањето на мирот и демократијата.

Администрацијата на Обама досега не даде коментар дали го смета за државен удар соборувањето од власт на претседателот Мохамед Морси.