Металург на чекор до финалето во Струга

Екипата од Автокоманда во драматична завршница го победи Брест Мешков од Белорусија со 21:20 (12:10)

Во драматична завршница екипата на Металург со 21:20 (12:10) синоќа го победи тимот на Брест Мешков од Белорусија во вториот ден од 41. Меѓународен ракометен турнир „Струга 2013“.

Во второто полувреме минатогодишниот победник имаше предност и од четири погодоци, но во последните четири минути дозволи Белорусите да се доближат, за неизвесност во завршницата со можност за израмнување.

Претходно романскиот шампион Констанца, предводен од поранешниот селектор на Македонската ракометна репрезентација Ѕвонко Шундовски и францускиот Иври во крајно неизвесна завршница одиграа нерешено 21:21 (10:9), а во дуелот на аутсајдерите на турнирот, домаќинот Струга загуби со 31:25 од францускиот Версај.

Турнирот вечерва продолжува со натпреварот Вардар – Иври (18:45), дуел кој директо решава за победникот во првата група. Вториот финалист ќе биде познат по натпреварите Металург – Версај (20:30) и Струга – Брест Мешков (22:00).

Утре е последниот ден од турнирот „Струга 2013“, резервиран за натпреварите за пласман.