Јубилејот без Докузовски и Марковски!?

Во долгата листа на заслужни за развојот на репрезентативната кошарка МКФ не подели признанија на двајцата селектори кои оставија историски облежја

На полувремето на мечот помеѓу Македонија и Литванија се одржа и свечена церемонија за одбележување на јубилејот 20 години од првиот натпревар на Македонската кошаркарска репрезентација. Македонската кошаркарска федерација (МКФ) им додели признанија и благодарници на сите оние кои придонеле во развојот на репрезентативна кошарка, но на листата освен некогашните селектори Лазар Лечиќ, Стерули Андоновски и Благоја Георгиевски-Буштур, ги немаше Марин Докузовски и Заре Марковски.

Која и да била замислата на челниците на „куќата на кошарката“ сепак кај многумина во салата “Борис Трајковски“ се наметна прашањето зошто немаше признание за Докузовски - селекторот со кој што Македонија го освои историско четврто место на ЕП во Литванија 2011 година.

Од МКФ го (не) заборавија и Заре Марковски, првиот селектор што ја одвел нашата земја на едно Европско првенство. Откако успешно ги мина квалификациите за ЕП 1999 година ги предводеше црвено-жолтите на континенталниот собир во Франција.

Во периодот по неговото напуштање на кормилото на македонската репрезентација Македонија долго време се бореше да го мине квалификацискиот циклус...по него и покрај тоа што бевме дел од европските првенства најголем успех постигна Марин Докузовски. Искусниот стратег на своите наследници им остави тешка задача - одбрана на четвртото место, што иако сите го посакуваме од се срце ќе биде тешко да се повтори, бидејќи противниците повеќе не не гледаат како аутсајдери.

Инаку наградени беа Александар Књазев, Давитков, Воиновиќ, Милан Сотировски, Ѓорѓи Књазев, Николче Петрушев, Игор Михајловски, Милан Медиќ, Петар Наумоски, Дејан Јовановски, Перо Настев, Перо Блажевски, Душко Боцевски, Врбица Стефанов, Горан Самарџиев, Марјан Ѓуров, Мирза Куртовиќ, Диме Тасовски, Димитар Мираковски, Тони Симиќ, Срѓан Станковиќ, Марјан Србиновски, Александар Димитровски.


МКФ: Признанија добија само пензионираните 

За да нема забуни во македонската јавност, македонската кошаркарска федерација (МКФ) веднаш се огласи за забелешките околу Марин Докузовски и Заре Марковски.

„Церемонијата на доделување на наградите беше поделена на два дела, првиот дел за оние што настапија за првата македонска репрезентација и вториот дел на оние што во минатото беа дел од националниот тим, но што во иднина веќе нема да го носат црвено-жолтиот дрес. Затоа и им беа дадени признанија на Књазев, Андоновски, Буштур... бидејќи тие повеќе никогаш нема активно да работат во репрезентацијата, па сакавме да им се заблагодариме за досегашниот придонес. Давитков доби признание како играч, а не како поранешен селектор. Што се однесува до Заре Марковски и до Марин Докузовски, сметаме дека вратата на нивна повторна работа во репрезентацијата не е затворена и тоа е единствената причина зошто не добија признанија. И двајцата беа поканети да бидат дел од синоќешниот натпревар, но не беа во можност да присуствуваат“, истакна директорот на македонската репрезентација, Илија Мерџановски.