Фарах најбрз и на 5.000 метри

Американците петти пат по ред станаа светски прваци во штафетата 4 х 400 метри, а со второ злато се закити Шели Ен Фрејзер Прајс од Јамајка на 200 метри

На 5.000 метри кај мажи олимпискиот шампион Британецот Мо Фарах, ја одбрани светската титула. Во возбудлив финиш тој го издржа нападот на конкурентите и со време 13:26.98 минути „дотрча“ до златото. Фотофинишот решаваше за среброто и бронзата бидејќи двајца атлетичари имаа исто време - 13:27.26 минути. Второто место му припадна на Хагос Гебривет од Етиопија, а третото е за Ајсах Киплагат Коеч од Кенија.

Шели Ен Фрејзер Прајс од Јамајка, по триумфот на 100 метри, беше најбрза и во трката на 200 метри. Таа имаше време 22.17 секунди. Мурел Ауре од Брегот на Слоновата коска го освои среброто со време 22.32 секунди, а бронзата Блесинг Окагбаре од Нигерија.

На крајот од натпреварувачкот ден Американците по петти пат по ред станаа светски прваци во штафетата 4 х 400 метри. Тие на доминантен начин со најдобро време оваа сезона стигнаа до златниот медал - 2:58.71 минути. Во изедначен финиш среброто им припадна на атлетичарите на Јамајка - 2:59.88 минути, кои беа за две стотинки побрзи од Русите - 2:59.90 минути.