Болт го истрча и третото злато

Машката штафета на Јамајка стигна до златниот медал со време 37.36 секунди на завршницата на СП во атлетика во Москва

На последниот ден од Светското првенство во атлетика во Москва беа одржани шест финални дисциплини. Јамајка уште еднаш ја потврди доминацијата во спринтерските дисциплини. Машката штафета на Јамајка предводена од Јусеин Болт во последнта замена стигнаа до златниот медал со време 37.36 секунди. За Болт ова беше трето прво место на шампионатот во Москва.

Среброто го освоија Американците, кои од 2007 година немаат златен медал во штафетата. Денеска Американците истрчаа 37.66 секунди, а бронзата ја освои Канада со време 37.92 секунди, откако Британците кои беа третопласирани се дисквалификувани.

Рекорд на светските првенства постави штафетата на Јамајка во женска конкуренција. Тие патеката 4 х 100 метри ја истрчаа со време 41.29 секунди. За Шели Ен Фрејзер Прајс од Јамајка, исто како за Болт, ова беше трет златен медал во Москва. Второ време имаше Франција, додека Американките и покрај лошата втора замена стигнаа до бронзениот медал.

Со четвртиот резултат на сите времиња во трискок Французинот Тиери Тамго го освои златниот медал. Тамго е третиот човек што ја има прескокнато должината од 18 метри. Тамго имаше резултат 18.04 метри во последната серија. Педро Пабло Пикардо од Куба го освои среброто откако имаше должина од 17.68 метри, а бронзата е за Американецот Вил Кејли со должина на трискокот 17.52 метри.

Кристина Обергфол од Германија конечно стана светска шампионка откако претходно на четирите учества на светските првенства имаше две сребра во 2005 и 2007 година. Таа во втората серија копјето го фрли со должина од 69.05 метри. Среброто и припадна на Кимберли Микле од Австралија, која имаше должина од 66.60 метри, а бронзата ја освои досегашната светска шампионка, Русинката Марија Абакумова со 65.09 метри.

Светскиот шампион од Даегу, Асбел Кипроп од Кенија, го одбрани златниот медал во трката на 1.500 метри. Тој постигна време од 3:36.28 минути. Среброто му припадна на Американецот Метју Центровиц со време 3:36.78 минути, а бронзата ја освои Јохан Кронје од Јужна Африка со време 3:36.83 минути.

Во трката на 800 метри кај жените победи Еунис Џепкоеч Сун од Кенија, која имаше резултат 1:57.38 минута. Русинката Марија Савинова стигна втора на целта, трета беше Американката Бренда Мартинез со 1:57.91 минута, а без медал остана Алисија Џонсон Монтано, која водеше во најголемиот дел од трката.

Најмногу златни медали (7) освои Русија, а најмногу медали САД - вкупно 25, од кои шест златни, исто колку и Јамајка.