Србија става рампа за македонските производи

Сите продукти што потекнуваат од нашата земја од викендов детално ќе се прегледуваат на границата

Сања Наумовска

Србија воведува контрамерки при увозот на производи од Македонија, како одговор на забраната за увоз на пченица и брашно. Сета стока која потекнува од нашата земја, од викендов детално ќе се прегледува на границата со северниот сосед, пишува белградскиот весник „Политика“, кој се повикува на извори од Владата на Србија.

Овие најави вчера не беа причина за реакција од домашното Министерство за земјоделство. Молкот од домашните институции на оваа тема трае веќе извесно време, а во последните изјави кон крајот на минатиот месец, министерот Љупчо Димовски тврдеше дека забраната за увоз ќе трае како што беше првично предвидено, до крајот на годината, односно, мерката ќе се укине кога ќе се стабилизира пазарот.

Иако најавуваше целосна блокада само за одредени македонски производи, Србија се одлучи за драстично засилени контроли на сите прехранбени и земјоделски производи кои се увезуваат од Македонија. Тоа, се очекува да го искомплицира и да го отежне увозот на стоки од нашата земја. Најмногу ќе настрадаат јаболката, доматите, грозјето, виното и колбасите, кои покрај лековите и цевките, се меѓу најизвезуваните производи од Македонија во Србија.

Засега само контролите ќе бидат одговор на неповлекувањето од македонската страна на одредбата за условен увоз на пченица и на брашно, која иако важи за сите земји од ЦЕФТА, најмногу ја погодува Србија.

Иако одлуката засега не ја потврдува ниту една надлежна институција во Србија, „Политика“ се повикува на изјава на заменик-министерот за внатрешна и надворешна трговија Бојана Тодоровиќ, која вели дека подолг период траат консултациите какви мерки да се преземат против Македонија. Според „Политика“, Македонија, не го испочитувала договорот кој го постигнале српскиот потпретседател на владата Расим Љајиќ и македонскиот министер за земјоделство Љупчо Димовски, нашата земја да ја укине одредбата за забрана за увоз на пченица, па одговорот на Србија бил неопходен.

„Македонија не ја повлече мерката, ниту пак има таква намера. Иако за тоа не постоеше прецизно утврден рок, ни беше ветено дека тоа ќе биде сторено во некој разумно време. Ние сметаме дека тоа е средината на месецов“, вели Тодоровиќ и додава дека ЦЕФТА, чии членки се и двете земји, предвидува засегнатата земја во вакви ситуации да воведе мерки како одговор.

Проблем, вели српската заменик-министерка, е што доколку Србија се одлучи на чекорот да го ограничи увозот на производи од Македонија, таа одлука ќе се однесува на производите од сите членки на ЦЕФТА, како што и забраната на увоз на пченица во Македонија се однесува на сите земји, а не само на Србија, иако оваа земја е најмногу погодена.

Во ЦЕФТА договорот за слободна трговија, освен Македонија и Србија, членуваат и Босна и Херцеговина, Албанија, Црна Гора и Молдавија. Северниот сосед е втор по големина трговски партнер на Македонија, а според податоците од Државниот завод за статистика вкупната размена на стока во 2012 година меѓу двете земји достигнала 789 милиони долари. Македонија увезла производи од Србија за 490 милиони долари, а извезла 298,8 милиони долари. Најмногу, нашата земја купила производи од железо, струја, пченка, сончогледово масло, брашно, безалкохолни пијалоци, пченица, цигари, млеко и млечни производи.