И Институтот за стандардизација ќе издава сертификати за ИСО-стандарди

До крајот на годинава Институтот за стандардизација на Република Македонија (ИСРМ) ќе стане тело за контрола на условите за квалитет и ќе издава сертификати за ИСО-стандарди. Ова го најави министерот за економија, Ваљон Сарачини, на денешната средба со Љупчо Давчев, директор на ИСРМ. Досега Институтот усвоил 98 проценти од европските стандарди и станал членка на Европската организација за стандардизација.

„Придобивките за нашата индустрија се големи. Во иднина при изработка на стандардите, без разлика дали се работи за наши домашни или, пак, европски, нашата индустрија ќе има право да дава предлози, да носи одлуки и да сугерира подобрување на секој стандард“, изјави Сарачини.

Според министерот, стандардите имаат огромно значење за компаниите кои извезуваат на европски пазар, затоа што со нив се зголемува квалитетот на производот, се избегнуваат пречките во трговијата, се зголемува конкурентноста. Во Германија 3 отсто од БДП се добива со употреба на стандарди.

Сарачини најави и контроли за одредени компании што се занимаваат со издавање сертификати за квалитет.„Имаме сознанија дека многу компании, човек-компанија, издаваат сертификати по еден месец. Тоа е невозможно и од септември ќе направиме план за следење на сите компании коишто имплементираат и издаваат ИСО-стандарди“, најави Сарачини.

Директорот Давчев истакна дека до крајот на година Институтот ќе формира одделение за сертификација за основниот стандард ИСО 9001. Со последната измена на Законот за стандардизација, новата надлежност на ИСРМ е „одобрување и мониторинг“ на апликациите за примена на националниот промотивен знак „Македонско сонценце“.(Ек.Р.)