Жерновски: Општината и Министерството за култура работеле незаконски на „Скопје 2014“

Градоначалникот на Центар ги предаде првичните наоди од ревизијата на проектот на Јавното обвинителство

Првичните наоди од ревизијата на проектот „Скопје 2014“ правена по налог на Општина Центар денеска беа предадени на Јавното обвинителство. Документите ги предаде лично градоначалникот Андреј Жерновски, кој смета дека извештајот содржи констатирани многубројни незаконски постапки на Министерството за култура и на претходното општинско раководство.

„Ревизорите ја завршија својата работа, а со ова предавање на документите и јас ја завршив својата, сега останува тоа да го стори и Обвинителството. Постојат сериозни индиции за незаконско работење, што претставува основа за постапување на Јавното обвинителство. Се разбира дека во оваа цела незаконитост не треба да се бара вина само во претходната локална власт, туку и во централната, поточно кај Министерството за култура, кое е директен поттикнувач. Предметот кој денеска му е предаден на Обвинителството претставува одлична шанса оваа државна институција да покаже дека судството во Македонија функционира и, конечно, да почнеме да ги бришеме негативните коментари дека имаме партизирано судство“, рече градоначалникот на Центар, Андреј Жерновски, и нагласи дека доколку и во вториот дел од ревизијата бидат констатирани неправилности, тој е должен и за тоа да го алармира Јавното обвинителство.

Инаку, вториот извештај од работата на комисијата која ја спроведува ревизијата на проектот „Скопје 2014“ се очекува да биде презентиран за неколку месеци.

Но, за советниците од ВМРО-ДПМНЕ доказите за кои говори Жерновски се неточни формулации. „Ние како советничка група сме убедени дека целиот проект е целосно легален и законит. Впрочем, Државниот завод за ревизија, на кој се повика Жерновски, досега има направено две ревизии, во 2008 и 2009 година, и нема констатирано никаква неправилност во постапките“, рече Даниела Рангелова од советничката група на ВМРО-ДПМНЕ, според која градоначалникот навел неточни формулации преполни со политички квалификации.

„Единствено што требаше да стори е да се извини за сите досегашни обвинувања дека проектот ‘Скопје 2014‘ е криминален. Но, наместо тоа, овој срам и политички пораз за него се труди да го надмине со тоа што ја префрла одговорноста кај други институции, а во овој случај кон Јавното обвинителство“, рече Рангелова и го повика Жерновски доколку е навистина убеден во неправилностите во владиниот проект лично, или во име на Општината, да поднесе тужби за сите обвинувања. (Дс.Т.)