ФОТО: Египет во хаос, над 525 загинати во судирите

Во земјата е воведена вонредна состојба, а потпретседателот Мохамед Ел Барадеј си поднесе оставка

Билансот на загинатите во вчерашните судири во Египет достигна 525 лица, изјави портпаролот на египетското Министерство за здравство, Халед ал Хатиб.

На цела територија на Египет регистрирани се 3.572 повредени лица. Приближно 200 луѓе загинаа на плоштадите во Каиро „Ан Нахда“ и „Рабија ел Адавија“, каде протестираа привразниците на соборениот претседател Мохамед Морси, кој беше уапсен на 3 јули од страна на армијата.

Египетската Влада соопшти и дека на неопределено време го затворила контролниот пункт на границата со Појасот Газа поради насилството.

Стотици палестински работници секојдневно поминуваат низ контролниот пункт Рафах на Синајскиот Полуотров.

Од вчера во сила е вонредна состојба, откако двата протестни кампови во Каиро беа целосно уништени, додека полицискиот час е во сила од 19 до 6 часот наутро по локално време.

Бројот на жртвите во вчерашните судири се разликува во зависност од изворот, па така „Муслиманско братство“ тврди дека погинале 2.200 лица, а повеќе од 10.000 се ранети.

Двата протестни кампови во Каиро сега се под контрола на полицијата, од кои еден беше расчистен за еден час по стапувањето во сила на полицискиот час, што е воведен во поголемите градови, меѓу кои се Каиро, Александрија и Суец.

По крвавите настани потпретседателот Мохамед Ел Барадеј поднесе оставка, а во земјата е воведена вонредна состојба

Потпретседателот на Египет Мохамед Ел Барадеј поднесе денеска оставка заради несогласување со одлуката на властите насилно да ги урнат протестните кампови на приврзаниците на соборениот од власт претседател Мохамед Морси во Каиро, што предизвика крвави судири.

- Ми стана претешко и понатаму да носам одговорност за одлуки за кои не се согласувам и од чии последици стравувам. За жал, од денешните случувања профитираат само оние кои повикуваат на терор и насилства, а тоа се екстремистичките групи, наведува тој.

Вршителот на должност претседател Адли Мансур претходно воведе вонредна состојба во државата за еден месец и полициски час во 11 провинции од 19 часот по локално време до шест часот наутро.