Протести во Битола за поддршка на осудениот за кражба на 100 илјади евра

Славко Даскаловски тврди дека не ја ограбил 81-годишната сосетка која ги чувала парите под перница

Битола - „Славко е апсолутно невин“, „Правда за Славко“. Вака гласеа дел од транспарентите кои педесетмина роднини и пријатели на битолчанецот Славко Даскаловски-Чупето, ги носеа на вчерашниот мирен протест пред Апелацискиот суд во Битола. Даскаловски беше осуден на 10 години затвор за грабеж на 81- годишната Марија Лукаревска, а од 100.000 евра се' уште нема ниту трага.

Неговите приврзаници кои се собраа пред судот, тврдат дека Даскаловски има алиби и дека целиот случај е местенка. Тие велат дека старицата, покрај Славко, за учесник во разбојништвото посочила и полицаец. Сепак, обвинението било темелено само, наводно, врз препознавање на Даскаловски од страна на ограбената жена. Одлуката на Основниот суд не е правосилна. Осудениот Даскаловски не е во притвор, се брани од слобода и се надева дека правдата ќе ја донесе Апелацискиот суд во Битола.

„Не сум виновен, немам никаква врска со грабежот. Згрешена е постапката. Старицата е манипулирана, ја најдоа стара жена и уште ја крадат. Од банката се префрлија нејзините пари на други сметки. Главните виновници се на слобода“, тврди осудениот Даскаловски.

Соседите и неговите пријатели тврдат дека во времето кога полицијата посочува дека било направено разбојништвото, обвинетиот го чистел паркот пред својата зграда, за што има повеќемина сведоци. Обвинуваат дека овој случај е монтиран, иако немаат одговор кој би бил мотивот. „Јас сум сведок дека пред зградата растоваравме чакал, заедно бевме и не' видоа луѓе. Имаме сведоци за тоа“, рече сведокот Ѓорги Ванчовски.

„Ова што му го направија на човекот е полициска монтажа. Како може полицаецот кој беше исто така посочен од старицата да не е во затвор, а Славе да е осуден. Не може вака едниот на слобода, а другиот надвор“, рече револтирано битолчанецот Методија Атанасов.

Бранителот на Даскаловски, битолскиот адвокат Васко Ѓоргиев, вели дека нивните аргументи се потпираат врз извршена ДНК-анализа, и од таму смета дека одлуката на Основниот суд е незаконита.

„Имаме алиби дека обвинетиот ниту бил ниту, пак, можел да биде на местото на настанот. Ниту, пак, се најдени траги или биолошки материјали. Направивме ДНК-анализи и тие покажуваат дека не потекнуваат од обвинетиот. Исто така и описот од старицата не упатува на неговиот лик. Донесена е незаконита одлука“, рече адвокатот.

Кражбата во станот на старицата се случи на 8 февруари лани, кога од под перница и' беа украдени 100.000 евра. На вратата на старицата заѕвониле тројца мажи, кои се претставиле како инкасатори, жената ја истуркале на креветот и и' ја затнале устата додека ги барале парите. (А.Б.)