27.09.2012, 14:38 Атина ќе штеди, но бара повеќе време
Грчките лидери начелно се согласија за мерките, следниот потег е затварање на преговорите со тројката
Атина - Лидерите на трипартиската грчка влада начелно се договорија за новиот пакет мерки. Следниот чекор се последните преговори со тројката за и официјално да се договори и заклучи новиот пакет мерки од 13.5 милијарди евра за следните две години. Ново главно барање на грчката влада ќе биде продолжување на рокот за имплементирање на мерките и исплаќање на долгот. Според првичните информации, 10 милијарди се очекува да дојдат од кратења на бонуси, плати и пензии во јавниот сектор, додека пак останатите 3.5 милијарди од нови даночни приходи. По скоро тричасовната средба со новата грчка тројка односно премиерот Адонис Самарас и лидерите на двете партии кои ја поддржуваат владата, Евагелос Венизелос и Фотис Кувелис, министерот за финансии Јанис Стурнарас изјави дека има договор за главните насоки за новите мерки и добра основа за да се продолжи и заврши преговарањето со претставниците на тројката ЕУ, ММФ и Европска Централна Банка. едиумите шпекулираат дека новата средба со тројката најверојатно ќе биде во понеделник.
Мерките за кои се преговара вклучуваат отпуштање на 15.000 вработени во државната администрација, кратење на 13 и 14 плата и 13 и 14 пензија, намалување на пензиите кои се повисоки од 1.000 евра, зголемување на возраста за пензионирање на 67 години, против кои остро се противат грчките граѓани оценувајќи ги мерките како непријателски за народот.
Двајцата владини партнери од ПАСОК и Демократска Левица, Венизелос и Кувелис побараа строго да се продолжи рокот во кој ќе се имплементираат мерките. Според Венизелос доколку рокот се продолжи до 2016 тогаш мерките ќе делуваат попријателски и поблаги за народот. Побара да се искористи клаузулата на замена на мерки односно да не се имплементираат најтешките кратења за грчката економија да може да тргне напред и да биде забележан напредок. (М.П.)
|
