27.09.2012, 16:07 Изет Зекири ги заглави пратеничките прашања
Пратеникот на НДП, слично како и пред два месеца, игра пинг-понг со министрите
Пратеникот на НДП, Изет Зекири, повторно ја окупираше собраниската говорница, блокирајќи ја на тој начин денешната седница за пратенички прашања.
Најревносниот парламентарец, кој пред два месеца стана рекордер со 50 поставени прашања, денеска добиваше одговори од министрите од различни ресори на своите нешто помалку од 20 претходно поставени прашања.
Речиси до 14 часот Зекири играше пинг-понг со министрите, а најмногу со првиот човек на Министерството за економија Ваљон Сарачини. Во своето најнова симултанка, Зекири беше фокусиран околу тоа како да му ги ослабе фигурите на Сарачини, советувајќи го некогаш да побара да присуствува на некое владино роуд шоу, колку, како што додаде, и тој да поарчи некој денар од буџетот.
„Имате 25 економски промотори кои собираат визит карти по светот. Треба да направите споредба на инвестициите во земјите во опкружувањето, кои, патем, немаат промотори, па да видите каков ефект имаме од нив. Во 2009 година во Македонија имало 197 милиони долари странски инвестиции. Во Косово, пак, 408, во Црна Гора над една милијарда, во Србија исто така, а во Бугарија над три милијарди. Во 2010 година кај нас влегле 207 милиони долари, а во Косово 457, во Црна Гора 760, и над милијарда во Србија. Во 2011 година имаме прилив од 410 милиони долари. Во Косова, пак, влегле 546, во Хрватска 1,4 милијарди, дури и БиХ е пред нас со 432 милиони долари“, ги читаше професорот Зекири своите добро познати споредбени анализи поткрепени со бројки. (Н.К.)
|
