Нови протести во Шпанија

Неколку илјади демонстранти и синоќа протестираа во близина на шпанскиот парламент во Мадрид.

Извикувајќи „Бараме оставка од владата“ и „Не се плашиме“, демонстрантите веќе втор ден по ред се собираат на плоштадот Нептуно. Тие повторно се соочија со припадници на полициските единици за растурање демонстрации. Во истиот дел од градот претходната ноќ полицијата ги разби демонстрантите со палки и гумени куршуми.

- Бев овде и вчера и ќе доаѓам секој ден да му кажам „не“ на овој систем, изјави Анхел Алкаиде, 30-годишен инженер кој носеше транспарент со натписот „Оставка“.

- Оваа влада е полоша од претходната. Таа ги штити привилегиите, луксузот, а луѓето едноставно мораат да штедат на здравјето и образованието, изјави 26-годишната Кармен Лопес, која живее во Лондон, бидејќи, наведува, била присилена да замине во странство затоа што во Шпанија нема работа за младите.

Повеќе од 60 лица, вклучувајќи и 27 полицајци, беа повредени во вторникот ноќта, во текот на антивладините демонстрации во близина на парламентот во центарот на Мадрид.