27.09.2012, 14:59 Стечајците на протест, бараат обесштетување од државата
Меѓу двете групи кои протестираа во исто време, во неколку наврати ќе дојдеше до инциденти, заради што интервенираше и полицијата
Пред Собранието на Македонија, истовремено со земјоделците, денеска се собраа и стечајците да го искажат својот револт и барањето конечно да бидат обесштетени за да имаат средства за достоен живот. Меѓу двете групи кои протестираа во исто време, во неколку наврати ќе дојдеше до инциденти, заради што интервенираше и полицијата. Стечајците, иако имаа намера да влезат во законодавниот дом да ги достават своите барања, не можеа да го пробијат полицискиот кордон.
Тие денеска уште еднаш побараа за нив да се дискутира во Парламентот и да се затвори нивното прашање.
„Денеска имаме пратеничко прашање до премиерот преку опозицијата, како и на кој начин мисли да го реши нашето прашање. Прашуваме и каде и кој министер треба да се поклони за и стечајците да добијат закон како и бранителите. Тие прашања ги упатуваат стечајците и јас лично до премиерот“, вели Лилјана Георгиевска, претседателка на Здружението на стечајци Куманово.
Таа истакна дека се собрале на уредно најавен протест, но и покрај тоа полицијата интервенира против нив.
„Во фаза на подготовка ни е предлог Законот за стечајци. Бараме да не обесштетат. Нашите барања се познати, 50 години старосна граница за жените, 53 за мажите и најмалку 15 години работен стаж. Сакаме да живееме како нормални граѓани, да имаме за јадење и за лекови да купиме. Како што државата не истера од фирмите, така сега да не згрижи“, рече Георгиевска. (Ек.Р.)
|
